Inihayag ni Shuvee Etrata na winner ang feeling niya dahil malapit na niyang maipatayo ang kaniyang dream house.
Inanunsyo ito ni Shuvee sa media conference ng Sparkle housemates sa nagdaang Pinoy Big Brother: Celebrity Collab Edition nitong Huwebes, na iniulat din sa Balitanghali.
“Maraming, maraming salamat po. Malapit na pong mapatayo ang aking dream house because of PBB. I truly feel like a winner,” saad ni Shuvee.
Para kay Shuvee, isa itong dream come true. Bukod dito, nagpasalamat din si Shuvee sa kabi-kabilang guestings at endorsements.
May upcoming project din siya kasama si Dingdong Dantes at Kapuso 3rd Big Placer ng “Pinoy Big Brother: Celebrity Collab Edition” na si Charlie Fleming.
“Abangan niyo po at because of PBB, grabe guys, nagkaroon tayo ng teleserye with Kuya Dingdong (Dantes). So abangan niyo po, Master Cutter,” ani Shuvee.
Magkakaroon din ng pelikula sina Shuvee at Charlie. – Jamil Santos/FRJ, GMA Integrates News
