Itinanghal si Dennis Trillo bilang Asia’s Best Actor in a Leading Role sa Asian Academy Creative Awards sa kaniyang pagganap bilang si Domingo Zamora sa “Green Bones.”
Ilan sa mga nakatunggali ni Dennis ang iba pang kilalang artista, gaya nina Jacob Elordi para sa “The Narrow Road to the Deep Road” at Park Bo Gum para sa “When Life Gives You Tangerines.”
“PANALO ang Pilipinas! Panalo ang PILIPINO,” sabi ni Dennis sa Instagram.
“Truly grateful for this,” dagdag niya habang naka-tag ang award-giving body. “Thank you very much.”
Tinanggap ni GMA Network Vice President for Musical, Variety, Specials, and Alternative Productions for Entertainment Group at Philippine Ambassador for the Asian Academy of Creative Arts Gigi Santiago-Lara ang award sa ngalan ni Dennis at ng “Green Bones” sa isinagawang seremonya sa Singapore.
“This is such a surprise and we are so honored to receive this in behalf of Mr. Dennis Trillo, ‘Green Bones,’ the producers, Nessa Valdellon, the writers Mr. Ricky Lee and Anj Atienza,” sabi ni Santiago-Lara sa kaniyang acceptance speech.
“‘Green Bones’ did very well in the Philippines and we are so honored to receive this award. Thank you to the academy.”
Ang "Green Bones" ang opisyal na entry ng GMA Pictures sa Metro Manila Film Festival 2024, na nanalo na rin ng iba pang awards gaya ng Best Actor para kay Dennis, Best Supporting Actor para kay Ruru Madrid, at Best Picture.
Ang kuwento ay tungkol kay Xavier Gonzaga (Ruru), isang bagitong pulis na pursigidong mapakulong ang kilalang kriminal na si Domingo Zamora (Dennis).
Wagi rin si Dennis ng Gawad Urian nitong Oktubre para sa kaniyang papel.
Napanonood ang “Green Bones” sa Netflix.
--Jamil Santos/FRJ GMA Integrated News
