Inihalal ng mga kongresista bilang bagong Speaker sa Kamara de Representantes ngayong Miyerkules si Isabela 6th District Representative Faustino "Bojie" Dy III. Pinalitan niya sa puwesto si Leyte 1st District Representative Martin Romualdez, na nagbitiw sa naturang posisyon.
BASAHIN: Romualdez, nagbitiw bilang Speaker ng Kamara
Matapos ianunsyo ni Romualdez ang kaniyang pagbibitiw sa puwesto bilang lider ng Kamara, ininomina ni Quezon City Rep. Ralph Tulfo, si Dy na gawing Speaker ng kapulungan.
Walang tumutol sa nominasyon at wala ring ibang pangalan na inirekomenda sa binakanteng posisyon ni Romualdez.
Sa ginanap na botohan, 253 na kongresista ang bumoto para kay Dy, 28 ang nag-abstain, at walang negative votes.
READ: Who is new Speaker Faustino 'Bojie' Dy III?
Bago maging Speaker, isa si Dy sa mga Deputy Speaker sa ilalim ng liderato ni Romualdez, bilang kinatawan ng Partido Federal ng Pilipinas (PFP).
Ang PFP ang political party ni Pangulong Ferdinand "Bongbong" Marcos Jr., na pinsan ni Romualdez.
Sa kaniyang pagbibitiw bilang Speaker, sinabi ni Romualdez na bababa siya sa puwesto para mailayo ang kapulungan mula sa mga paratang ng katiwalian na ibinabato laban sa kaniya.
“The longer I stay, the heavier that burden grows on me, on this House, and on the President I've always sought to support. And so, after deep reflection and prayer, I have made a decision today, with a full heart and a clear conscience, I tender my resignation as Speaker of the House of Representatives,” saad ni Romualdez sa harap ng mga kongresista.
“I do this so that the Independent Commission on Infrastructure may pursue its mandate freely and fully, without doubt, without interference, without undue influence,” dagdag niya. -- mula sa Llanesca T. Panti/FRJ GMA Integrated News
