Inanunsyo ni National Capital Region Police Office (NCRPO) director Police Major General Debold Sinas nitong Biyernes ang pag-angat sa puwesto ni dating Southern Police District chief Police Brigadier Gen. Nolasco Bathan, ang opisyal na umagaw sa cellphone ni GMA News reporter Jun Veneracion habang nagkakagirian sa prusisyon ng Itim na Nazareno.

Sa pulong balitaan, sinabi ni Sinas na itatalaga si Bathan bilang Deputy Regional Director for Operations, kapalit ni Police Brig. Gen. Albert Ignatius Ferro, na inilipat naman sa Central Visayas regional police office.

Ayon kay Sinas, "promotion" ang bagong posisyon ni Bathan mula sa pagiging dating pinuno ng SPD, na pangangasiwaan naman ngayon ni acting district director Police Colonel Emmanuel Peralta.

Noong nakaraang buwan, naging kontrobersiyal si Bathan matapos niyang agawin ang cellphone ng reporter ng GMA na si Jun Veneracio, na kumukuha ng video sa girian ng mga pulis at mga deboto ng Itim na Nazareno.

READ: Cellphone ng GMA reporter na may kuha ng girian ng mga deboto at pulis, 'inisnatch' ng pulis

Ibinalik naman kay Veneracion ang cellphone pagkaraan ng ilang minuto pero binura na ang video na kuha sa nangyaring kaguluhan. Gayunman, naibalik ang naturang video sa pamamagitan ng "Recently Deleted" album sa cellphone.

Humingi ng paumahin kinalaunan kay Veneracion si Bathan at sinabing hindi niya alam na mamamahayag ang inagawan niya ng cellphone.

“I would like to apologize for what happened at Ayala Bridge during the procession of the Black Nazarene 2020 wherein I confiscated the cellular phone of a media personality who was later on identified as Mr. Jun Veneracion of GMA 7, thinking that he was someone who poses [a] threat to the procession,” paliwanag noon ni Bathan.

"What happened between me and Mr. Veneracion was somehow a misunderstanding and I again sincerely apologize for my actions," dagdag nito.

Bukod sa SPD, dating pinamunuana din ni Bathan ang Eastern Police District at naging Deputy Regional Director for Administration of the Police Regional Office 11 (Davao Region).— FRJ, GMA News