Tatlo na ang kabuuang kaso ng Omicron variant sa Pilipinas matapos madagdagan ng isa, ayon sa Department of Health nitong Lunes.
Sinabi ni Health Undersecretary Maria Rosario Vergeire, na isang returning overseas Filipino (ROF) na 36-anyos ang panibagong kaso ng Omicron variant.
Nanggaling siya sa Qatar at dumating sa bansa noong November 28 via Qatar Airways Flight number QR 924.
“He arrived at Mactan Cebu International Airport from Qatar on November 28 via Qatar Airways… and was noted to have had travel history to Egypt,” sabi ni Vergeire sa media briefing.
Wala pa umanong bakuna ng COVID-19 vaccine ang ROF.
Nang dumating sa Cebu ang ROF, sinabi ni Vergeire na isinailalim ito sa quarantine facility, at nagpositibo sa COVID-19 noong December 5.
Inilagay naman siya sa isolation facility hanggang noong December 16, at umuwi sa Cavite noong December 17, kung saan sasailalim naman siya sa home quarantine.
“The case completed his isolation in Cebu before traveling back to Cavite, his home town, where he immediately self-quarantined at home upon arrival,” ani Vergeire.
"The case is currently finishing his home quarantine in Cavite...asymptomatic since his arrival," dagdag ng opisyal.
Lumabas umano ang resulta ng genome sequencing sa ROF noong December 18. Kinabukasan, isinailalim muli siya sa COVID-19 test at negatibo ang resulta.
“The DOH is already determining the possible close contacts among co-passengers during the flights of this case,” ayon kay Vergeire.
“The DOH [is] also verifying the test results and health status of all passengers of this flight if there are other confirmed cases or passengers who became symptomatic after arrival,” dagdag ng opisyal.
Mayroon umanong tatlong close contact ang ROF na isinailalim sa COVID-19 test, at negatibo rin ang kanilang resulta.
“Kung saan na-monitor natin, home quarantine sila. We already re-tested them and all of them had results of negative,” pahayag ni Vergeire.
--FRJ, GMA News
