Inaresto ng mga tauhan ng Philippine Drug Enforcement Agency (PDEA) ang anak ni Justice Secretary Jesus Crispin "Boying" Remulla dahil sa pagtanggap ng bagahe na may lamang "kush" o high-grade marijuana na tinatayang P1.3 milyon ang halaga. Ang kalihim, 'di raw makikialam sa kaso ng anak.

Sa ulat ni JP Soriano sa GMA News "24 Oras" nitong Huwebes, kinilala ang inaresto na si Juanito Jose Remulla III.

Ayon sa mga awtoridad, nasabat ng PDEA ang shipment ng marijuana sa Ninoy Aquino International Airport. Galing ang bagahe sa San Diego, California.

Ang nakababatang Remulla umano ang tumanggap ng bagahe na kaagad na inaresto. 

Sa Twitter post ng dzBB, sinabing naaresto ng PDEA ang nakababatang Remulla sa Las Piñas City.

 

 

Sa Facebook post, kinumpirma ni Cavite Governor Jonvic Remulla, na panganay na anak ng kaniyang kapatid na si Boying si Juanito.

Nasa Geneva, Switzerland si Boying para dumalo sa kombensiyon tungkol sa karapatang pantao.

Sa ipinadala niyang pahayag, sinabi ng kalihim na hindi siya makikialam sa kaso ng kaniyang anak.

“I am both a father and the secretary of Justice, roles that I take very seriously. We all know about unconditional love, but at 38 years old, he will have to face his predicament as a fully emancipated child,” ayon kay Boying.

“I will not intervene in nor influence my son’s predicament, and I have not done so in any way… A person should always face the consequence of their actions and I will let justice take its own course,” dagdag niya.

Aminado ang kalihim na mahirap para sa kanilang pamilya ang pangyayari pero hahayaan niyang umusad ang batas.

Nagpahayag din si Gov. Jonvic na hindi sila gagamit ng impluwensiya para tulungan ang pamangkin.

“I personally feel that while he deserves all of my empathy, there will be no support extended in terms of using my position in government. While he is family, my oath as Cavite Governor and as a Public Servant is paramount above any of his alleged transgressions,” giit niya.

Nagpasalamat naman ang kalihim at gobernador sa PDEA sa pagtupad sa kanilang tungkulin.

“I thank the PDEA for doing their job without fear or favor. I have no conflict with them. This is a very difficult time for me and my family. But this is nothing compared to what so many Filipinos are going through,” sabi ng Sec. Remulla.

“We would like to thank the PDEA for doing their job. We were never informed of their operation and they were correct in doing so. There should be no fear nor favor in the conduct of their duties,” pahayag naman ni Gov. Remulla.— FRJ, GMA News