Sinabi ni Pangulong Ferdinand ''Bongbong'' Marcos Jr. na "horrified" siya o nangilabot nang malaman ang tungkol sa umano'y gentleman's agreement na pinasok ni dating Pangulong Rodrigo Duterte sa pamahalaan ng China patungkol sa BRP Sierra Madre na nakasadsad sa Ayungin Shoal sa West Philippine Sea.

''Ang sinasabi sa agreement na 'yan ay kinakailangan tayong magpermiso sa ibang bansa para gumalaw sa ating sariling teritoryo. Mahirap siguro sundan 'yang ganyang klaseng agreement," ayon kay Marcos sa ambush interview nitong Miyerkules.

"I am horrified by the idea that we have compromised into a secret agreement the territory, the sovereign rights of the Filipino,'' dagdag pa niya.

Hinihintay umano ni Marcos na bumalik sa Pilipinas si Chinese Ambassador Huang Xilian para tanungin tungkol sa sinasabing kasunduang pinasok ni Duterte sa China.

"We still have it to clear it up, we are waiting for Ambassador Huang to come back from Beijing, umalis siya and I asked to see him. Baka siguro sa pagbalik niya, at ipaliwanag niya, sino ba ang kausap mo, sino ba talaga ang kausap mo, ano ang pinag-usapan niyo, ano ang pinag-agreehan niyo?'' ayon kay Marcos.

Sinabi ng pangulo na walang alam ang kaniyang administrasyon o record tungkol sa sinasabing kasunduan.

''It turns out it's a secret agreement, we don't know anything about it, there is no documentation, no record, there is no... we were not briefed, when I came into office, wala pong nagsabi sa amin na may ganoong usapan,'' paliwanag niya.

Nang tanungin kung kakausapin ba niya si Duterte tungkol sa nasabing kasunduan, sinabi ni Marcos na nakipag-ugnayan ang kaniyang administrasyon sa mga dating opisyal ng nakaraang administrasyon para wala silang makuhang direktang paliwanag.

''They are talking to his former officials. Maybe not the President himself but his former officials. Tinatanong namin, ano ba 'yan? Paliwanag niyo naman sa amin para alam namin 'yung ginagawa namin," saad ni Marcos.

Idinagdag ng pangulo na "it's not a good situation" na inilihim ang umano'y kasunduan.

Unang napaulat ang sinasabing kasunduan mula kay dating presidential spokesperson Atty. Harry Roque na binanggit niya ang tungkol sa walang paggalaw dapat sa BRP Sierra Madre sa Ayungin Shoal.

Pero kinalaunan, nilinaw ni Roque na patungkol sa kapayapaan sa kabuuan ng West Philippine Sea ang umano'y kasunduan ni Duterte sa China.

Itinanggi naman ni Atty. Salvador Panelo, dating chief presidential legal counsel ni Duterte, na may gentleman's agreement na pinasok ang dating administrasyon sa China.

Komento kay Marcos

Nang hingan ng komento tungkol sa pahayag ngayon ni Marcos, sinabi ni Roque na hindi umano naiintindihan ni Marcos ang kasunduan.

Iginiit din niya na ang kasunduan ay para sa "maintaining peace and resulted in increased investment, trade and tourist [arrival] from China."

"[The] President is [the] chief architect of foreign policy. PBBM [Marcos' initials] could formulate his own. Certainly, FPRRD's policy did not result on the mess that we're in now with China," ani Roque.

Nanindigan naman si Panelo na wala talagang gentleman's agreement si Duterte sa Chinese government.

''Three former Cabinet members, namely former  Executive Secretary Salvador Medialdea, former  Defense Secretary Delfin Lorenzana and former DILG Secretary Eduardo Año already made separate statements that no such agreement, whether formal or informal regarding the West Philippine Sea, Ayungin Shoal or the the BRP Sierra Madre, was entered [into] by FPRRD,'' ani Panelo sa ipinadala niyang mensahe.

''I was present in the state visit made by FPRRD in China as well as in the dialogue between the Chinese President and FPRRD. No such agreement was made between the two,'' dagdag pa niya.

Sinabi ni Panelo na hindi papasok si Duterte sa anumang kasunduan na, ''that is against our national interest, sovereignty and territorial integrity.''

Maaari umano nabigyan lang ng maling impormasyon si Marcos tungkol sa naturang kasunduan na wala naman talaga.

''People should be wary of spreaders of false news and bogus narratives,'' ani Panelo. — mula sa ulat ni Anna Felicia Bajo/FRJ, GMA Integrated News