Suspendido ng 90 araw ang lisensiya ng isang driver ng Ferrari sports car matapos niyang i-video ang sarili habang nagmamaneho, ayon sa Land Transportation Office (LTO) nitong Sabado.
Ayon sa pahayag ng ahensiya, iginiit ni Acting Transportation Secretary Giovanni Lopez na peligroso ang ginawa ng driver ng Ferrari convertible sa mga kasabay niyang motorista't pasahero.
"Delikado 'yung mga ganitong gawain kasi hindi lang siya 'yung pwedeng mapahamak, kundi pati ibang road users. Kaya hindi natin palalampasin ito, para hindi na rin gayahin ng iba. Bawal ang mayabang at arogante driver," sabi ni Lopez.
Dagadag pa niya, dapat na laging pairalin ang tamang pag-uugali sa pagmamaneho at isipin ang kapakanan ng lahat at hindi ang pansariling interes lamang.
Inisyuhan ng show cause order ang driver at pinagpapaliwanag sa Intelligence and Investigation Division (IID) ng LTO sa East Avenue, Quezon City ngayong Huwebes, Oktubre 30, kung bakit hindi siya dapat ireklamo ng Reckless Driving, Anti-Distracted Driving Act, at kung bakit hindi dapat suspendihin o kanselahin ang kaniyang driver's license dahil sa pagiging Improper Person to Operate a Motor Vehicle.
"Provisionally, your Driver's License with DL No. (binura) shall be PREVENTIVELY SUSPENDED FOR A PERIOD OF NINETY (90) DAYS, pending the outcome of the ongoing investigation. Concurrently, your owned motor vehicle with Plate No. NBY7985 shall be placed under ALARM status. You are further directed to SURRENDER YOUR DRIVER'S LICENSE on the date of the scheduled hearing," saad sa show cause order. — VDV GMA Integrated News
