Nagbitiw sa kani-kanilang posisyon sina Executive Secretary Lucas Bersamin at Budget Secretary Amenah Pangandaman.

Inihayag ito ni Palace Press Officer Undersecretary Claire Castro sa pulong balitaan ngayong Lunes.

Papalit bilang Executive Secretary na tinatawag ding “Little President,” si Ralph Recto, na kasalukuyang kalihim ng Finance department.

Magiging officer in charge naman ng DBM si Budget Undersecretary Rolando Yu Toledo.

Umugong nitong Linggo na aalisin sa puwesto si Bersamin, at papalitan siya ni Recto.

Si Special Assistant to the President for Investment and Economic Affairs Frederick Go, ang papalit kay Recto sa DOF.

Ayon kay Castro, kusang nagbitiw sina Bersamin at Pangandaman dahil sa "delicadeza" matapos mabanggit ang mga pangalan nila sa umano’y anomalya sa paggamit ng pondo sa flood control projects.

Kasama ring nagbitiw si Adrian Carlos Bersamin, na pinuno ng Presidential Legislative Liaison Office (PLLO), ang tanggapan na nakikipag-ugnayan sa Kamara de Representantes at Senado.  

Kamag-anak ng nakatatandang Bersamin si Adrian.

"These leadership changes reinforce the President's commitment to strengthening institutions, improving coordination across government, and keeping the administration focused on delivering stability, opportunity, and security to Filipino families," ayon kay Castro.

"The Office of the President assures the public that all agencies will continue to operate without interruption and with the same commitment to effective governance and public service. Yan po ang anusyo sa araw na ito," dagdag pa niya. 

Sa post sa "X," ni dzBB reporter Ninfa Ravelo, inihayag ni Recto tungkol sa kaniyang pagkakatalaga bilang executive secretary na, “at this decisive moment is an honor matched only by its gravity.”

Hindi rin niya nais ang titulong “little president” na tinatawag din sa mga taong humahawak ng naturang posisyon.

“First, I don't agree with that term Little President. There is only one president,” saad niya. “There is only one president. Let us disabuse ourselves of the notion that the Executive Secretary clothed with some mythical awesome powers.”  – FRJ GMA Integrated News