DILG, sisiyasatin kung totoo na napasok ng mga hacker ang kanilang internal systems

Sinabi ng Department of the Interior and Local Government (DILG) nitong Linggo na iimbestigahan nila ang ulat na na-hack umano ang kanilang internal systems.

Sa isang pahayag, sinabi ng ahensya na nananatiling matatag ang kanilang mga sistema pero in-activate na nila ang containment at security protocols upang masiguro ang proteksiyon ng kanilang mga datos.

“Our technical teams and government cybersecurity units are undertaking the appropriate investigative steps,” ayon sa DILG.

“For now, we ask the public not to rely on unverified posts,” dagdag nito.

Inilabas ng DILG ang pahayag matapos sabihin ng IT Expert at ScamWatch founder na si Art Samaniego Jr. na nakakuha umano ang mga hacker ang humigit-kumulang 400GB ng datos mula sa DILG na isang large-scale government data breach.

“We will be coordinating with the Cybercrime Investigation and Coordinating Center (CICC) and the Philippine National Police Anti-Cybercrime Group about this,” saad sa Facebook post. —Jiselle Anne Casucian/FRJ GMA Integrated News