Kinumpirma ng Stores Specialists Inc. (SSI) na pinatatakbo ng mga Tantoco na isasara na nito ang operasyon ng British clothing, furniture, at foods brand na Marks & Spencer.
Sa isang disclosure sa Philippine Stock Exchange, sinabi ng SSI na, “it will cease operations of Marks & Spencer in the Philippines, with the final day of store operations set for May 2, 2026.”
Binuksan sa Pilipinas ang unang tindahan ng Marks & Spencer halos 40 taon na ang nakararaan.
“Since then, under SSI’s stewardship, the brand has been an important part of the Philippine retail story," sabi ng SSI.
Dagdag pa nito, ang pagsasara ng British fashion and food brand “has not been an easy decision."
“Building Marks & Spencer in the Philippines has been a meaningful and rewarding chapter for our organization. We are deeply grateful to our loyal customers, dedicated employees, and partners who have supported the brand through the decades,” sabi pa nito.
Tiniyak din ng SSI na makikipagtulungan ito sa mga empleyado, partner, at stakeholders para masiguro ang responsable at magalang na transisyon sa pagsasara ng operasyon.
“Further details regarding timelines, promotions, and customer advisories leading up to May 2, 2026 will be communicated in due course,” sabi nito.
Mayroong 13 sangay ang Marks & Spencer sa buong bansa, at matatagpuan ang flagship store nito sa Central Square sa Bonifacio Global City.
Bukod sa Marks & Spencer, hawak din ng SSI ang iba pang luxury brand gaya ng Hermes, Cartier, Salvatore Ferragamo, Zara, at Alo, at iba pa.—Jamil Santos/FRJ GMA Integrated News
