Dalawa ang kumpirmadong patay habang apat ang sugatan sa nangyaring pamamaril sa isang residential building sa Barangay Marcelo Green, Parañaque, ayon sa Parañaque Police. Ang gunman, isang residente roon.
Sa ulat ni Bam Alegre sa GMA News Unang Balita nitong Huwebes, sinabing naganap ang insidente nitong Miyerkoles ng gabi.
Mapanonood ang cellphone video mula sa isang residente ng lalaking nakapulang t-shirt na nakahandusay sa sahig, na biktima ng pamamaril.
Kinumpirma ni Parañaque City Chief of Police Nicholas Piñon sa GMA Integrated News na anim ang biktima ng pamamaril.
Dinala sa ospital ang iba at mga ligtas na.
Personal na nasaksihan ni “Max,” hindi niya tunay na pangalan, ang pamamaril sa isa niyang kapitbahay. Kuwento niya, nakaharap niya mismo ang gunman at muntik na rin siyang barilin.
“Ang unang narinig ko is ‘yung gunshots sa loob ng court. Akala namin kasi mga laro-laro lang po ‘yun. Until I realized ‘yung gunman ay pupunta sa court… I saw him holding a gun while running, it’s a silver gun din,” sabi ni Max.
Inilarawan ni Max ang shooter na naka-face mask at naka-baseball cap.
“As I remember, there was a ***, and blood from his head. Tiningnan ko ‘yung gunman, nagka-opportunity kung puwede pa akong umalis. Nakita ko na may opportunity, tapos umalis po agad ako sa main entrance ng court po,” sabi ni Max.
“Before I run out po sa court, I only heard gunshots and I didn’t look out,” sabi pa ni Max.
Galit at pangamba ang nararamdaman ng ina ni Max lalo't hindi pa nadadakip ang gunman.
“I’m very traumatized and also very, very angry. Because my son was just lucky to be alive right now. Because we don’t know where the gunman is. We don't have any information as to where the gunman is,” sabi ng ina ni Max.
Dahil dito, naka-hazard ang mga mobile ng pulisya, partikular ang SWAT o Special Weapons and Tactics Team ng lungsod, sa magdamag.
Hindi pinahintulutan ang GMA Integrated News na pumasok sa loob ng property.
Dagdag ng Parañaque Police, nagsasagawa sila ng hot pursuit operation dito sa shooter.
Ang Azure Property Management ay naglabas ng isang pahayag tungkol sa insidente.
"Management is fully cooperating with the police and remains committed to supporting the ongoing investigation. The safety and security of all our residents continue to be our highest priority," sabi neto.
"We are extending our full support to the victims and their families, coordinating with the proper channels to ensure they receive the necessary care and attention during this difficult time." —Jamil Santos/ VAL GMA Integrated News
