Hindi naglabas ng temporary restraining order (TRO) ang Korte Suprema (SC) para awatin ang Kamara de Representante sa pagtalakay sa impeachment complaints laban kay Bise Presidente Sara Duterte. Gayunman, inatasan ng mga mahistrado ang kapulungan at ang House justice committee na magkomento kaugnay sa petisyon na humiling na ipatigil ang naturang proseso laban sa pangalawang pangulo.

Sa isang pahayag nitong Miyerkoles, sinabi ng SC na pinagsama-sama ang mga petisyong inihain ni VP Duterte at ng ilan pang mga abogado na kumukuwestiyon sa impeachment proceeding.

“The SC consolidated these cases and, without necessarily giving due course to the petitions, directed respondents to comment within a non-extendible period of 10 days from receipt of notice,” saad pahayag.

Idinagdag ni SC spokesperson Atty. Camille Ting, walang TRO na inilabas ang mga mahistrado para ipatigil ang ginawang pagdinig sa Kamara tungkol sa impeachment complaint laban kay Duterte.

Iginalugod naman ni Speaker Faustino “Bojie” Dy III ang naturang desisyon ng SC na hindi maglabas ng TRO.

“The House of Representatives welcomes the Supreme Court’s non-issuance of a temporary restraining order. We have the highest respect for the Court and its processes, and we defer to its authority on matters properly brought before it,” saad ni Dy sa pahayag.

“In the absence of any legal restraint, the House of Representatives will continue to discharge its constitutional mandate,” dagdag niya.

Noong Marso 27, hiniling ng mga abogadong sina Israelito Torreon, Vic Rodriguez, Rescie Angelli Rizada-Nolasco, Martin Delgra III, Wendel Avisado, James Patrick Bondoc, Raul Lambino, Luna Maria Acosta-Manlitoc, Jesus Hinlo Jr., at Dr. Richard Mata, sa SC na maglabas ng TRO laban sa impeachment proceedings.

Naghain naman si Duterte ng hiwalay na petisyon noong Marso 30.

Sa kaniyang petisyon para sa certiorari, iginiit ni Duterte na labag sa Konstitusyon ang mga pagdinig ng House justice panel, at wala itong kapangyarihang magsagawa ng paglilitis.

“It is evident that the proceedings before the respondent committee are, in truth and substance, a trial in disguise. Its members’ use of various nomenclatures such as a 'mini-trial,' a ‘hearing proper,' or a ‘process akin to a preliminary investigation’ does not change its true nature,” ayon sa petisyon.

Iginiit din ng bise presidente na wala umanong due process at patas na pagtrato, at binanggit na ang procedural due process ay nangangailangan ng higit pa sa simpleng abiso na magpatawag, at sa halip ay “genuine and meaningful opportunity to be heard.”

Sa isa pang pahayag, iginiit din ng kampo ni Duterte na hindi layunin ng petisyon na iwasan ang proseso kundi para humingi ng linaw sa mga usaping konstitusyonal.

Samantala, sinabi ni Bicol Saro Rep. Terry Ridon, miyembro ng House justice panel, na nakabatay ang petisyon ni Duterte “on a misrepresentation of facts and a distorted interpretation of the Constitution and prevailing jurisprudence.” — Joahna Lei Casilao/FRJ GMA News