Maliban kay Senador Ronald “Bato” Dela Rosa, present ang 23 senador sa plenaryo ng Senado ngayong Lunes upang buuin ang kapulungan bilang impeachment court na lilitis kay Bise Presidente Sara Duterte. Kaugnay ito sa mga paratang ng Kamara de Representantes na may kinalaman sa umano’y mabigat na paglabag ng huli sa Saligang Batas, pagkakasangkot sa katiwalian, at pagtataksil sa tiwala ng publiko.

Isinuot ng mga senador ang kanilang maroon na toga, at nanumpa ang mga senador bilang mga hukom ilang araw matapos nilang matanggap ang Articles of Impeachment mula sa Kamara de Representantes.

Hindi dumalo sa sesyon si Dela Rosa na may kinakaharap na warrant of arrest na inilabas ng International Criminal Court (ICC). Kaugnay ito sa kampanya kontra-droga ng administrasyong Duterte kung saan nagsilbi si Dela Rosa na hepe ng Philippine National Police.

Si Senador Camille Villar, ang pinakabatang senador, ang nangasiwa sa panunumpa kay Senate President Alan Peter Cayetano bilang presiding officer ng impeachment court. Kasunod nito, pinanumpa naman ni Cayetano ang lahat ng senador bilang mga hukom.

"For the record, Resolution No. 39 or the Rules of Procedure on Impeachment Trial should continue to apply. We further note that Rule 6, which therefore provides that the provisions of the Rules of the Senate and the revised Rules of Court shall apply suppletorily whenever applicable," ayon kay Cayetano.

Nangyari ang pagbuo ng impeachment court sa harap ng ugong ng panibagong kudeta para mapalitan sa puwesto si Cayetano, na pumalit kay Sen. Tito Sotto bilang lider ng kapulungan noong nakaraang Lunes.

Matapos buuin ang impeachment court, sinabi ni Cayetano na maglalabas ng writ of summons ang korte para kay Duterte, na dapat sagutin sa loob ng 10 calendar days na hindi puwedeng palawigin.

"The Sergeant-At-Arms is directed to serve the written summons on Vice President Sara along with a copy of the Articles of Impeachment," ani Cayetano.

Samantala, maaaring magsumite ng tugon ang prosecution sa loob ng hindi mapapalawig sa loob ng limang araw mula sa pagtanggap ng sagot.

"The parties may file their pleadings and annexes in person or through email. All other pleadings, motions similar intended for the consideration of this court may be filed electronically," sabi ng lider ng Senado, na idinagdag na magbibigay sila ng gabay hinggil sa format ng mga dokumento at paraan ng electronic filing para sa lahat ng partido.

Pinalinaw naman ng bagong Senate Minority Leader na si Sen. Vicente "Tito" Sotto III ang bilang ng araw ng pagsagot sa mga summon kung “working” o “calendar” days.

"The Clerk of Court is hereby authorized to calendar the case for pre-trial and issue the corresponding notices to the parties after the last pleading is filed," ani Cayetano.

"Upon conclusion of the pretrial, the trial proper shall commence on a date and time fixed by the court of which the parties shall be duly notified," dagdag niya.

Sinuspinde ng Senado ang sesyon nitong Lunes ng hapon.

Noong Mayo 11, inaprubahan ng Kamara sa botong 257-25 ang ikalawang impeachment laban kay Duterte dahil sa mga alegasyon ng mabigat na paglabag sa Konstitusyon, katiwalian, pagtataksil sa tiwala ng publiko, panunuhol, at iba pang mabibigat na krimen. — FRJ GMA News