Hiniling ng Department of Justice (DOJ) sa Office of the Ombudsman na sampahan ng mga kasong plunder at graft sina Senador Jose “Jinggoy” Estrada, dating Department of Public Works and Highways (DPWH) Secretary Manuel Bonoan, at iba pa. Kaugnay ito ng umano’y sabwatan sa bidding ng mga proyekto ng gobyerno kapalit ng kickback.

Nitong Lunes, sinabi ni Assistant Ombudsman Mico Clavano, na natanggap na ng Office of the Ombudsman ang naturang rekomendasyon ng DOJ para sa pagsasampa ng mga kaso.

Maliban kina Estrada at Bonoan, ang iba pang inirekomenda ng DOJ na kasuhan ay sina:

  • Bong Dinglasan, DPWH Assistant District Engineer, North Manila
  • Denryl Caesar Cortuna , Assistant District Engineer, North Manila
  • Manny Bulusan, District Engineer, South Manila
  • Arturo L. Gonzales, Jr.
  • several John/Jane Does

“The preliminary investigation accumulated exhaustive evidence, including legislative records, Position Description Forms, and sworn transcripts from the Senate Blue Ribbon Committee hearings held on November 14, 2025, which detailed illicit maneuvers and alleged 30-percent cuts surrounding regional flood control projects,” ayon kay Clavano.

“Following months of evaluation, the submission of counter-affidavits, and extensive evidence-gathering, the DOJ panel concluded that there is an interconnected network of public officers who abused their official designations to manipulate project specifications, clear budgets, and rig public bidding workflows,” dagdag niya.

Bukod sa plunder at graft, nais din ng DOJ na sampahan sina Estrada at iba pang opisyal ng gobyerno ng mga kasong direct bribery at pagtanggap umano ng regalo.

Inirekomenda rin ng DOJ ang pagsasampa ng kasong corruption of public officials sa ilalim ng Article 212 ng Revised Penal Code laban sa mga pribadong indibidwal at umano’y mga kasabwat.

Dadaan pa sa pagsusuri ng Office of the Ombudsman ang rekomendasyon ng DOJ, na ahensiyang may pinal na kapangyarihan sa pag-uusig sa mga tiwaling opisyal ng gobyerno.

Sinisikap pa ng GMA News Online na makuha ang reaksiyon ng senador at mga kasama niyang pinakakasuhan ng DOJ. — FRJ GMA Integrated News