Inilibing na ang student-athlete ng Ateneo de Manila University at ipinagmamalaki ng Agusan del Sur na si Rene Baterbonia sa kaniyang bayan ng Talacogon sa Agusan del Sur nitong Miyerkoles.

Isinagawa ang isang funeral convoy na dinaluhan ng kaniyang pamilya, mga kaibigan, teammates, at mga miyembro ng komunidad, bago inilibing si Baterbonia, edad 18, sa Talacogon Municipal Memorial Park, kung saan siya ang unang taong inilibing doon.

Mahigit dalawang linggo na ang nakararaan mula nang pumanaw si Baterbonia sa isang insidente ng pagkalunod habang isinasagawa ang isang team-building activity sa Dipaculao, Aurora, noong Hunyo 8. Bukod sa kaniya, pumanaw din sa insidente ang Nigerian big man na si Divine Adili.

Bago ang kaniyang libing, nagkaroon ng mga pampublikong lamay sa Quezon City, Davao, at Agusan del Sur para parangalan ang buhay at legasiya ni Baterbonia.

Isinilang at lumaki si Baterbonia sa Talacogon bago itinuloy ang kaniyang karera sa basketball sa Ateneo de Davao University. Tinulungan niya ang paaralan na makuha ang 2025 Palarong Pambansa boys' basketball title sa Ilocos Sur.

Sa parehong torneo, pinangalanan si Baterbonia bilang Most Valuable Player (MVP) nang makuha ng Davao Region ang kauna-unahang kampeonato sa basketball ng Palarong Pambansa.

Patuloy ang mga imbestigasyon sa pagkamatay nina Baterbonia at Adili, na isinasagawa ng mga ahensiya ng gobyerno at ng Ateneo.—Bea Micaller/Jamil Santos/LDF GMA News