Itinalaga ni Pangulong Ferdinand Marcos Jr. ngayong Lunes si Dr. Jose Pujalte Jr. bilang bagong kalihim ng Department of Health (DOH). Ito ay matapos magbitiw sa naturang posisyon si Dr. Ted Herbosa dahil umano sa usapin ng kaniyang sariling kalusugan.
Una rito, naghain si Herbosa ng kaniyang courtesy resignation kay Marcos matapos siyang sumailalim sa knee replacement surgery, na kinumpirma ni Health Undersecretary Albert Domingo nitong weekend.
“Today, I tendered my courtesy resignation as SOH (Secretary of Health) to PBBM. My operation has made me realize that I also need to take care of myself,” saad ni Herbosa sa kaniyang mensahe sa hospital officials.
Sa isang briefing, sinabi ni Palace Press Officer Claire Castro na tinanggap ni Marcos ang pagbibitiw ni Herbosa.
Itinalaga ni Marcos si Herbosa bilang kalihim ng DOH noong 2023, bilang kapalit ni officer-in-charge Maria Rosario Vergeire.
Ayon kay Herbosa, matapos ang operasyon sa tuhod, sasailalim siya sa masusing rehabilitasyon sa loob ng tatlo hanggang apat na buwan.
Kaugnay ng operasyon, iniulat na naghain ng sick leave si Herbosa, at nasundan na ito ng kaniyang pagbibitiw.
Samantala, napag-alaman na bahagi na rin ng DOH mula pa noong 1991 ang bagong kalihim ng DOH na si Pujalte.
Mayroon siyang masters sa hospital administration mula sa Ateneo Graduate School of Business. Nagtapos naman siya ng kursong doctor of medicine sa University of the Philippines College of Medicine.
Noong 2014, itinalaga si Pujalte bilang medical center chief II ng Philippine Orthopedic Center. Nagsilbi rin siyang presidente ng Philippine Orthopedic Association at ASEAN Orthopedic Association.
Siya rin ang founding president ng Philippine Shoulder Society at founding member ng Philippine Spine Society. — Giselle Ombay/FRJ GMA News
