Dahil sa pagkapanalo ni Catriona Gray bilang Miss Universe, ilang celebrity ang nagkaroon ng inspirasyon na sumabak sa beauty pageant. Si Solenn Heussaff, ginaya naman ang sikat na "lava walk" ng Pinay beauty queen.

Si Teresita Ssen "Wyn" Marquez, na itinanghal na Reina Hispanoamerica 2017, pinag-iisipan daw na muling sumali sa Binibining Pilipinas, ayon sa ulat ng GMA News TV "Balitanghali" nitong Miyerkoles.

Hanga raw ni Teresita sa determinasyon na Catriona na dating sumali rin sa Miss World pageant bago nakamit ang korona ng Miss Universe.

Kaya kung mabibigyan daw ng pagkakataon, malaki raw ang posibilidad na sumali ulit si Teresita.

Hindi naman itinanggi ni Gabbi Garcia na pangarap niyang maging beauty queen at may mga humihimok sa kaniyang sumali sa pageants.

Masaya daw ang aktres sa nakamit na tagumpay ni Catriona.

Sabi pa ni Gabbi, nananatiling buhay ang kaniyang pangarap na makakuha ng korona pero hindi pa raw sa ngayon dahil nasa pag-aartista ang atensyon niya.

Ang "Taste Buddies" host naman na si Solenn, ginaya naman ang signature "slow mo" twirl ni Catriona na ikinatuwa ng netizens.

 

 

May iba pa na humirit na gawin din daw sana ito ni Nico.

 

 

--FRJ, GMA News