Binisita at makipag-bonding si K Brosas sa kaniyang kaibigan na si Kris Aquino.
Sa Instagram, ibinahagi ni K ang larawan nila ni Kris at ng anak na si Bimby sa tahanan ng mag-ina.
“At last nakapunta na kay gorge [Kris Aquino] kahit medyo mahina at masama pakiramdam nya super chika galore tulad lang ng dati. Infairness, medyo nag-gain na siya ng konting weight,” caption ng komedyana, na humiling ng patuloy na panalangin para kay Kris.
Nag-iwan din ng madamdaming mensahe si K para kay Bimby, at inihayag kung gaano siya ka-proud sa bunso ni Kris.
“Bimb, sobrang nakaka proud ka! halos buong araw kami magkasama kahapon, nakakatuwa na makita sha na binata na at sobrang sweet, bait, napaka gentleman at super humble. See you guys uli soon.. Lablablab!,” ani K.
Noong Abril, ibinahagi ni Kris na na-diagnose siya ng siyam na autoimmune disease.
Ayon sa Queen of All Media, mayroon siyang Autoimmune Thyroiditis, Chronic Spontaneous Urticaria, EGPA, Systemic Sclerosis/ Scleroderma, Lupus, Rheumatoid Arthritis, Fibromyalgia, Polymyositis, at Mixed Connective Tissue disease.
Noong Pebrero, muling nagpakita si Kris sa publiko sa unang pagkakataon sa kabila ng hamon sa kaniyang kalusugan sa People Asia People of the Year 2025 awards night at nagpakita ng suporta sa kaniyang kaibigan na si Michael Leyva.
--Jamil Santos/FRJ, GMA Integrated News
