Lilibutin ni Superman ang buong mundo, at una niyang pupuntahan ang Maynila sa Pilipinas.
Sa video post ng produksyon ng upcoming “Superman” movie, inanunsyo nito na magkakaroon ng world tour ang cast at crew ng pelikula, at unang titigil sa Manila sa June 19.
Inaasahan na darating sa bansa ang bagong Superman o Clark Kent na si David Corenswet, kasama si Rachel Brosnahan bilang si Lois Lane, at si Lex Luthor na ginampanan ni Nicholas Hoult.
Kasama rin ang writer, director, at co-producer ng pelikula na si James Gunn at DC Studios head at co-producer na si Peter Safran.
Gaganapin ang fan event ng Superman cast and crew sa SM Mall of Asia Music Hall sa June 19. Hindi pa inaanunsyo ang ticketing details ng event.
Nakatakdang ipalabas ang “Superman” sa mga sinehan sa July 9.
Ayon kay Gunn, higit pa sa pelikula para sa kaniya ang "Superman".
"It’s a story about humanity, about what it means to be a hero in a world that doesn’t always make it easy to be one,” paliwanag niya. “I can’t wait for you to see it. The heart, the action, and the incredible performances from David Corenswet, Rachel Brosnahan, Nicholas Hoult and the entire cast.”
Kasama rin sa pelikula sina Edi Gathegi, Anthony Carrigan, Nathan Fillion, Isabela Merced, Skyler Gisondo, Sara Sampaio, María Gabriela de Faría, Wendell Pierce, Alan Tudyk, Pruitt Taylor Vince, at Neva Howell. — mula sa ulat ni Nika Roque/FRJ, GMA Integrated News
