Walang problema sa “It’s Showtime” host na si Vice Ganda kahit pa tawagin siya ng mga tao na “sir.”
Inihayag ito ni Vice sa isang episode ng noontime show kamakailan nang tawagin siya ng isang contestant sa Laro Laro Pick segment na “sir” habang nagkukuwento ng kaniyang buhay.
Dito nilinaw ni Vice na walang problema sa kaniya na tawagin siyang sir.
“For once and for all, let’s normalize me being called ‘sir.’ I’m okay with ‘sir,’” anang TV host-actor.
“Para hindi na siya ginagawang katatawanan ‘yung pagtawag sa ‘kin ng sir kasi okay lang naman sa ‘kin ang ‘sir.’ Normal lang ‘yun,” dagdag niya.
Wala rin naman daw problema sa kaniya kung tawagin siyang “maám,” sabi pa ni Vice.
Dati na ring sinabi ni Vice na itinuturing niya ang sarili na non-binary, kaya hindi niya mamasamain kung “he” o “she” ang gawing pagtukoy sa kaniya.
Samantala, nagpapasalamat naman si Jackie Gonzaga sa pagiging “nurturing” at “generous” ni Vice Ganda, na tumatayo niyang manager.
Inihayag ito ni Jackie nang maging siya sa “Fast Talk with Boy Abunda” nitong Huwebes, kasama ang co-host niya sa “It’s Showtime” na si Cianne Dominguez.
Sa naturang talk show, tinanong ni Tito Boy si Jackie kung kumusta si Vice bilang manager.
“Siyempre po may pressure, Tito Boy. Kasi si Ate Vice, perfectionist. Talagang sarado, kuwadrado, perfectionist. Pero sobrang grateful po ako kasi nurturing din si Ate, generous din siya sa knowledge. Kung ano alam niya, isi-share niya, talagang bibigyan ka rin niya ng advice, tips on paano ka mag-grow,” ayon kay Jackie. – FRJ GMA Integrated News
