Kinagiliwan ng netizens ang level up at todo effort na mga Halloween costume na ginayak ng ilang Kapuso stars.
Sa Chika Minute report ni Athena Imperial sa 24 Oras Weekend nitong Sabado, mapanonood ang under the sea na tema ng Halloween costumes nina Jennylyn Mercado at Dennis Trillo.
Hindi mapigilan ni Jen ang kaniyang pagtawa habang suot ang Ursula costume, samantalang King Triton naman ang gayak ni Dennis.
Binuo ng kanilang pamilya ang cast ng The Little Mermaid, kung saan naka Princess Ariel costume si Dylan, Prince Eric si Jazz at Sebastian si Calix.
Isa namang fierce sea princess si Kyline Alcantara.
Nakatanggap siya ng papuri mula sa netizens dahil sa intricate details ng kaniyang makeup, prosthetics at costume. Ayon pa sa ilan, mala-Encantadia ang atake ng team Kyline.
Little Queen of Lireo naman ang anak ni Iza Calzado Wintle na si Deia Amihan, kaya “like mother, like daughter” ang cute na tagapagbantay ng brilyante ng hangin.
Bihis Taylor Swift naman si Barbie Forteza, na isang Swiftie.
Kuhang-kuha ni Barbie si Taytay sa kaniyang Eras Tour glittery bodysuit and folklore dress.
Sumayaw naman sa kanta ni Taylor Swift na Opalite sina EA Guzman at Shaira Diaz sa kanilang vibrant gummy candy costumes para sa Trick or Treat ngayong taon. —Jamil Santos/VBL GMA Integrated News
