Ibinasura ng Department of Justice (DOJ) ang reklamong isinampa laban sa aktres na si Gretchen Barretto at ilan pang inireklamo kaugnay ng mga nawawalang sabungero.

Sa 120-pahinang joint resolution, sinabi ng lupon ng mga prosecutor na “speculative and uncorroborated” ang ebidensya laban sa tinatawag na Pitmaster Alpha Group, na kinabibilangan umano ni Barretto.

“The Patidongan brothers merely alleged that these persons attended meetings where decisions were supposedly made to ‘punish’ cheating sabungeros,” saad sa desisyon.

“However, there is no showing that they gave direct orders, participated in logistics, or had knowledge of the specific abductions. Their alleged ‘approval’ during meetings was unsupported by any document, recording, or independent witness,” dagdag nito.

Sinabi rin sa desisyon na kahit na naroon sina Barretto at iba pang persolidad sa mga pagpupulong na  tinatalakay ang krimen, hindi ito maituturing na nakipagsabwatan sila maliban kung may patunay ng intensyon at partisipasyon.

Dahil dito, sinabi ng lupon na dapat ibasura ang reklamo laban sa grupo dahil sa kawalan ng merito, “without prejudice should future evidence arise linking them directly to the unlawful detentions.”

Malugod na tinanggap ng kampo ni Barretto ang resolusyon.

“As Ms. Gretchen Barretto had steadfastly maintained, there is no truth to the accusations against her. She played no part in the case of the missing sabungeros. Thankfully, the Department of Justice agreed,” sabi ni Atty. Alma Mallonga, legal counsel ni Barretto, sa isang pahayag.

“Ms. Barretto is grateful to all those who expressed their support and who stood by her throughout her ordeal,” dagdag niya.

Bukod kay Barretto, inirekomenda rin sa desisyon na ibasura ang reklamo laban sa dating hepe ng National Capital Region Police Office na si retiradong Police General Jonnel Estomo, na sinabing wala siyang kaugnayan sa anumang lantarang gawain.

“While their names appear in the enumeration attached to Julie’s statement, there is a total absence of any act, statement, or circumstance showing knowledge of, participation in, or agreement to the alleged conspiracy,” sabi nito.

“The mere mention of their names without factual narration of their involvement does not meet the quantum of evidence required to establish a prima facie case,” dagdag pa nito.

Bukod pa rito, binanggit sa desisyon na batay sa mga personal na palagay o impormasyong galing sa ibang tao ang mga pahayag laban sa kaniya at sa iba pa.

Sinabi ng lupon na sabi-sabi lamang ito at hindi sapat upang malampasan ang constitutional presumption of innocence.

Nauna nang iniulat na nakakita ang mga tagausig ng prima facie evidence para kasuhan ang negosyanteng si Charlie "Atong" Ang, at 21 iba pa ng kidnapping with homicide at/o kidnapping with serious illegal detention.

Nag-ugat ito sa reklamong isinampa ng mga pamilya ng mga nawawalang sabungero laban kay Ang at iba pa para sa serious illegal detention at multiple murder, bukod sa iba pa.

Ang desisyon ay base sa sinumpaang salaysay ng whistleblower na si Julie "Dondon" Patidongan at ng kaniyang kapatid na si Ellakim, na nagsasaad na si Ang ang umano’y may command responsibility at active inducement sa mga operasyon sa pagdukot sa mga biktima.

“His orders and financial support constituted indispensable inducement to commit the unlawful detentions. The one who exerts moral ascendancy and provides material support for the crime is equally liable as the material authors,” sabi sa desisyon.

“His acts reveal not mere acquiescence but direct supervision of the scheme, using his farm and organization as the staging ground,” dagdag nito.

Inihayag naman ng abogado ni Ang na si Gabriel Villareal, ang rekomendasyon ng DOJ ay "...deeply flawed and grossly unfair to the accused." Maghahain umano ng motion for reconsideration ang kanilang kampo. – Jamil Santos/FRJ GMA Integrated News