Simula sa Hunyo 1, ititigl muna ng Overseas Workers Welfare Administration (OWWA) ang transportation at accommodation assistance program sa mga returning overseas Filipino workers (OFWs) na nasa Alert Level 1.
“In light of the IATF pronouncement placing the National Capital Region and other areas in the country on Alert Level 1 status, services, and industries including public transportation are in full operating capacity,” ayon kay OWWA Administrator Hans Leo Cacdac nitong Martes.
“Hence, transportation assistance for returning OFWs shall be suspended effective June 1, 2022,” dagdag niya.
Hindi naman kasama rito ang mga distressed OFW na sertipikado ng Philippine Overseas Labor Offices (POLO) o nasuri ng authorized OWWA airport officers.
Sakop din ang mga Pinoy na uuwi sa bansa sa pamamagitan ng government-initiated mass repatriation flights o OFWs provided airfare ng POLOs sa mga commercial flight.
Kasunod ng direktiba, titigil na rin ang operasyon simula sa June 1 ng OWWA-chartered buses sa Parañaque Integrated Terminal Exchange at OWWA-sweeper flights sa NAIA Terminal II.
Samantala, nilinaw ng ahensiya na aalalay pa rin sila sa mga partially vaccinated o unvaccinated OFWs na kailangang sumailalim sa mandatory facility-based quarantine. Gayunman, hindi na sasagutin ng OWWA ang kanilang transportasyon pabalik sa kanilang lalawigan.
Ang mga Pinoy na mangangailangan ng tulong ay pinayuhang makipag-ugnayan sa OWWA sa pamamagitan ng hotline o Repatriation Assistance Division sa (02) 88917601 local 5213 o sa email address: rad@owwa.gov.ph. — FRJ, GMA News
