QUEZON - Kanselado na ang pagdiriwang ng masaya at makulay na Pahiyas Festival ng Lucban, Quezon sa Mayo 15, 2020 dahil sa banta ng COVID-19.

Ang executive order ay inilabas ni Lucban Mayor Olivier Dator.

Kanselado na rin ang ibang gawain na may kinalaman sa paggunita ng Semana Santa.

Hinikayat ng pamahalaang lokal ang pag-iwas ng mga residente sa mga crowded na lugar.

 

Dahil sa banta ng COVID-19, kinansela na ng pamahalaang lokal ang Pahiyas Festival na taunang ginagawa tuwing Mayo. Peewee Bacuño

 

Ayon sa Department of Health, nitong Biyernes ay umabot na sa 64 ang nakumpirmang kaso ng COVID-19 sa bansa.

Nitong Sabado naman ay kinumpirma ng probinsiya ng Batangas na may nagpositibo sa COVID-19, dahilan para umakyat ang bilang ng mga kaso ng novel coronavirus sa nasabing probinsiya sa tatlo.

Samantala, anim na ang naitalang namatay sa Pilipinas dahil sa COVID-19. Ang pinakahuling namatay ay ang isang Pilipinong pasyente sa Cagayan de Oro City. —KG, GMA News