Dating Cebu governor at kongresista na si Pablo Garcia, pumanaw na

Pumanaw na sa edad 95 ang dating House deputy speaker at naging gobernador din ng Cebu na si Pablo "Pabling" Garcia.

Nagpaabot ng pakikiramay ang liderato ng Kamara de Representantes sa mga naulila ni Garcia na naging mambabatas noong 8th, 9th, 14th, at 15th Congress.

"The House of Representatives, led by Speaker Lord Allan Velasco, mourns the demise of former Deputy Speaker and Cebu Rep. Pablo 'Pabling' P. Garcia," nakasaad sa pahayag.

"Our prayers and heartfelt sympathies to the family and loved ones he has left behind, especially to his son and our colleague in the 18th Congress, Deputy Speaker Pablo John F. Garcia," patuloy niya.

Naging gobernador naman ng Cebu si Garcia mula 1995 hanggang 2004. At nagsilbi ring bise gobernador noong 1969 at 1971.

Anak ni Garcia ang kasalukuyang gobernador ng lalawigan na si Gwendolyn, at sina Deirdra, Winston, Byron, Farla at Pablo John.

Sa ulat ng GMA Regional TV News, sinabi ni Pablo John na limitado lang para sa pamilya ang burol at libing ng ama dahil na rin sa kasalukuyang quarantine restrictions sa lalawigan. — KBK/RSJ, GMA News