Nanawagan si Isko Moreno na iwasan ang galit sa gitna ng masiglang kompetisyon ngayon ng mga noontime show sa telebisyon. Ang kanilang "Eat Bulaga," hangad lang umanong maghatid ng saya at tulong sa mga tao.
"The least thing that we can do is to compete, but not to inculcate hate. In fact mas beneficial ‘yan (competition) sa viewers. Kasi competition brings the best out of you, as an artist, as a performer,” sabi ni Isko sa “Updated with Nelson Canlas” podcast.
“Hindi yung, ‘Dapat mawala na ‘yan kasi ito legit, ito fake, ito luma, ito bago.’ Its just plain and simple competition, at the end of the day it is the viewers who will decide,” pagpapatuloy ng dating Manila Mayor.
Para kay Isko, “long haul” o “marathon” na matatawag ang engagement ngayon ng "Eat Bulaga" ng TAPE Inc., ma isa siya sa mga host.
Nauna nang inihayag ni Isko na healthy competition ang paglipat ng "It's Showtime" sa GTV.
“I hope everything will turn out to be better for everyone because this is our industry. We've heard the complaints on whether the movie industry, the television industry is not doing well. And yet 'pag may mga bagong programa mag-i-initiate tayo ng hate, mag-i-initiate tayo ng galit, mag-i-initiate tayo ng division,” paliwanag niya.
Inihayag ni Isko ang kaniyang paghanga sa Korean movie and TV industry, na bagama’t may kompitensiya sa mga programa at kanilang mga talent, nagawa naman nitong maimpluwensiyahan ang ibang mga bansa tungkol sa kultura ng Korea.
Para kay Isko, dapat gayahin ng Pilipinas ang Korea.
“Let’s compete. Competition in a healthy manner pero ang magbebenepisyo tayo rin sa industriya," saad niya.
Matatandaang na kumalas sa TAPE Inc. noong Mayo sina Tito Sotto, Vic Sotto, at Joey de Leon, at ang iba pang host ng Eat Bulaga.
Sinabi naman ni Isko na, “As I have said so many times, we cannot take away what Tito, Vic and Joey have done in Eat Bulaga. But life must go on, we must move on." --FRJ, GMA Integrated News
