Inihayag ng Thai-Irish actor na si Kevin Dasom na nililigawan niya si Herlene Budol.

Sa nakaraang episode ng “The Boobay and Tekla Show,” kinumpirma ni Kevin, habang hawak-hawak ang kamay ni Herlene na,“I have courted Herlene already.”

“Not just to Herlene but to her parents as well, to her friends and family, to everyone close to Herlene,” dagdag ni Kevin.

Ayon kay Kevin, sinuyo niya ang mga mahahalagang tao sa buhay ni Herlene at para ipakita na, “I am being genuine and being honest.”

Inilahad naman ni Herlene na nililigawan siya ng basketball player mula pa noong Enero, at ito ang unang pagkakataon na niligawan siya ng isang dayuhan.

“Tsaka ‘yung siyempre sa Pilipinas kasi 'di ba, kailangan mong magligaw talaga nang normal,” sabi ni Herlene. “Sabi niya, I ask you na ano, ‘if I courted with you,’ if it is okay to me. And then I said, okay, and then... Ano ba sagot ko?”

“Siyempre pabebe muna pero para sa akin, okay na ‘yun. Pero kasi akala niya ‘pag sinabi kong okay na, ibig sabihin kami na. I explained to you ‘di ba.”

Nang tanungin si Kevin kung gaano siya katagal handang maghintay para maging pormal ang kanilang relasyon, sagot niya, “I'm old already, so I have the wisdom of age.”

Sinabi rin ni Herlene na kailangang maghintay upang matiyak na malinis ang intensyon ni Kevin.

“Alamin natin kung totoo ba talaga kasi siyempre marami nagsabi-sabi na, kasi baka dahil nandito lang siya, kaya niya ‘ko bet, or baka dahil nag jo-join sa flow flow ba, kung ano mang flow 'yan. Ang akin, tignan natin," ani Herlene.

Dagdag pa ni Herlene, hinamon niya si Kevin na kausapin ang kaniyang manager, pamilya, at mga kaibigan para masigurong seryoso ito sa kaniya.

“Ginawa naman niya lahat. Hindi ko rin masabi [kung kailan], alamin natin. Sasabihin ng times,” saad ng Kapuso star.

Sa parehong episode, tinanong ni Herlene si Kevin kung mahal siya nito. Tumingin ang binata sa kaniyang mga mata at sumagot na, “Of course, I love you.”

Nagpasalamat naman si Herlene sa pagmamahal ni Kevin.

Bumida sina Herlene at Kevin sa “Binibining Marikit.” Kasama rin sa cast si Tony Labrusca. -- FRJ GMA Integrated News