Patay ang captain ng Barangay Tres de Mayo sa Digos City, Davao del Sur matapos siyang pagbabarilin habang naka-Facebook live nitong Martes ng gabi.
Kinilala ng Davao del Sur Police Provincial Office ang biktima na si Oscar “Dodong” Bucol Jr.
“At around 9:00 PM on November 25, 2025, the victim was fatally shot within the premises of his residence, specifically in his garage,” ayon sa pahayag ng pulisya nitong Miyerkoles.
“Portions of the incident were captured during his ongoing Facebook Live broadcast,” dagdag nito.
Nagsagawa umano ng dragnet operation ang Digos City Police Station (CPS) sa lugar ng pinangyarihan ng krimen at maging buong lalawigan para madakip ang salarin.
Isang Special Investigation Task Group (SITG) din ang bubuuin para tutukan ang imbestigasyon sa kaso.
Inihayag din ng provincial police na may persons of interest na sila. Mula ito sa mga taong binatikos ng biktima sa kaniyang social media posts.
Sinusuri din ng mga awtoridad ang mga CCTV camera sa lugar na maaaring makatulong sa imbestigasyon.
Mariin ding kinondena ng Davao del Sur Police Provincial Office ang brutal na pagpatay sa punong barangay.
“The Davao del Sur Police Provincial Office assures the public and the family of Barangay Captain Bucol that every effort is being exerted to ensure that justice is served,” saad nito sa pahayag.
“We urge the community to cooperate and provide any information that may assist in the speedy resolution of this case,” dagdag nito. — Joviland Rita/FRJ GMA Integrated News
