Dahil kinakain ang mga itlog ng tilapia at bangus, itinuturing na invasive species at peste sa mga palaisdaan ang mga Chinese softshell turtle. Kaya naman ang ilang residente, hinuhuli at ginagawa itong ulam at pulutan sa Negros Occidental. Pero ligtas bang kainin ang naturang uri ng pagong? Alamin.

Sa nakaraang episode ng “Kapuso Mo, Jessica Soho,” ipinakilala ang vlogger na si Allan Arao-Arao, na mula sa Silay City sa Negros Occidental, na madalasgawing content ang mga seafood.

Sa kaniyang mga video, ang pinaka pinag-usapan ng kaniyang followers ay ang pagluto niya ng adobong Chinese soft-shelled turtle.

“Hindi ko naman sukat-akalain na magba-viral talaga 'yun. Bago ‘to sa pananaw ng iba, mayroong iba na nandidiri,” sabi ni Arao-Arao.

Ngunit nilinaw ni Arao-Arao na legal ang pagluluto niya ng naturang uri pagong dahil itinuturing itong invasive o nakasasama sa ibang hayop at naninira ng mga farm.

“Nabibilang sila doon sa isang tinatawag nating ‘invasive alien species.’ Maramihan sila kung mangitlog. ‘Yung mga hatchlings ng mga like tilapia or bangus, kinakain nila 'yun. Wala nang ma-harvest 'yung fishpond owners. Hindi naman natin ito binabawal. Kailangan lang nilang kumuha ng permit sa DENR,” paliwanag ni Esteven Toledo, in-charge ng Wildlife Rescue Center.

Ayon kay Arao-arao, allergic siya sa mga malalansang pagkain. Pero nang kainin niya ang Chinese turtle ay wala siyang naramdamang allergic skin reaction.

Matatagpuan ang mga Chinese soft shelled turtle sa isang bahagi ng Bago River.

Si Remy Banosing, kaibigan ni Arao-Arao, at mahigit tatlong dekada nang nanghuhuli ng Chinese softshell turtle, maingat sa paghuli nito at gumagamit ng pana dahil napakasakit umano nito kung mangagat.

Ang kada pagong, tinatayang nasa dalawa hanggang tatlong kilo ang bigat na ibinibenta niya ng P300 kada kilo.

Ayon kay Banosing, nawala umano ang hika ng kaniyang anak matapos niya itong pakainin ng Chinese softshell turtle.

“Ang paniniwala sa pagkain ng Chinese softshell turtle na nakagagaling ng hika. Naniniwala dito 'yung mga traditional Chinese medicine, pero wala pa tayong mga pag-aaral tungkol dito,” sabi ng nutritionist na si Ma. Lindsay Alvarez.

Samantala sa San Mateo, Rizal, hindi lang inuulam ng may-ari ng kainan na si Jerome Aguayon ang Chinese softshell turtle, kundi pinupulutan din. Bestseller niya ang sisig na pagong.

Dating welder si Aguayon pero dahil sadyang hilig niya ang pagluluto, nagtayo siya ng sariling kainan.

Inaangkat pa niya sa Bulacan ang pagong sa halagang P150 kada kilo. Nagkakahalaga ng P170 ang kada serving ng sisig na pagong.

“Nagsimula po ako sa itik, tapos sinabi niya sa akin 'yung pagong. Mayroong mga nagulat, mga natawa. Pero iba naman, gusto naman. Kasi hindi pa sila nakakatikim sa buong buhay nila. Dahil hindi ko inuman 'yung puwesto ko, mayroon talaga at mayroong bibili,” sabi ni Aguayon.

Ayon sa isang nutritionis, maaaring kainin ang mga Chinese softshell turtle pero ang mas ipinapayo niyang iluto ay ang mga "cultured" o sadyang alaga at hindi ang mga basta nakukuha sa kung saan-saan.

“Mayaman sa protina, particularly 'yung collagen niya. Mas nire-recommend 'yung mga cultured talaga. ‘Yung mga wild na Chinese softshell turtle, maaaring magtaglay ng mga parasites. Maaaring siyang makaramdam ng pananakit ng tiyan, pagsusuka. Maging mapanuri sila, lutuin itong mabuti at i-check natin 'yung quality ng mga turtle na ‘to,” sabi ni Alvarez.

Tunghayan sa KMJS ang pagluluto sa Adobo at Menudo ng Chinese softshell turtle, na tila baka o kambing umano ang lasa. – FRJ GMA News