Kabilang ang pelikulang "Green Bones" ng GMA Pictures sa tala ng mga official contender para maging pambato ng Pilipinas sa prestihiyosong 2026 Oscars sa Amerika.
Sa social media post ngayong Biyernes, inihayag ng GMA Pictures ang bagong karangalang inani ng multi-awarded film na pinagbibidahan nina Dennis Trillo at Ruru Madrid.
"A story worth sharing with the world — reminding us that even in the darkest places, humanity endures. ‘Green Bones’ challenges us to look deeper and question our ideas of justice and redemption," saad sa post ng GMA Pictures.
Binati rin ng GMA Pictures ang anim pang pelikulang pinagpipilian para tumayong entry ng bansa sa 98th Academy Awards: "Food Delivery," "Sunshine," "Hello Love Again," "Magellan," "Song of the Fireflies," at "Some Nights I feel Like Walking."
"We also extend our warmest congratulations to the 6 other incredible films in contention. It’s an honor to stand alongside such world-class Filipino cinema," saad nito.
Ang "Green Bones" ang naging official entry ng GMA Pictures sa Metro Manila Film Festival 2024, at humakot ng mga parangal kabilang ang Best Actor para kay Dennis; Best Supporting Actor para kay Ruru; at Best Picture.
—FRJ GMA Integrated News
