Naghain ng reklamong cyberlibel ang bilyonaryo at negosyanteng si Enrique Razon laban kay Cavite 4th District Rep. Kiko Barzaga kaugnay ng umano’y mga maling pahayag ng mambabatas na ipinost nito sa kaniyang social media account.
Ayon sa abogado ni Razon na si Atty. Laurence Arroyo, ang reklamo ay may kaugnayan sa Facebook post ni Barzaga noong Enero 9 na nagsasaad na, “NUP (National Unity Party) Congressmen received bribes from Enrique Razon in various gatherings in Solaire prior to the 2025 elections in exchange for supporting Speaker Martin Romualdez [of Leyte].”
“The basis of this complaint is our position that what he said is false and malicious,” saad ni Arroyo sa mga mamamahayag.
Si Razon ang chairman ng port operator na International Container Terminal Services Inc. (ICTSI), at pangalawa sa pinakamayamang Pinoy ngayon base sa tala ng Philippines’ 50 Richest List ng Forbes Asia.
Nang hingan ng pahayag, sinabi ni Barzaga sa GMA News Online na, “I will face him in court.”
Una rito, inihayag ni House Deputy Speaker at NUP chairman Ronaldo “Ronnie” Puno, na maghahain din siya ng reklamo laban kay Barzaga, na dati nilang kapartido.
“The allegations are baseless, reckless, and malicious... We will see him in court, since he chose to malign all members of the NUP—a party once led by his own father and one that he himself joined," ayon kay Puno.
Dati nang inihayag ni Barzaga na may basehan ang kaniyang alegasyon.
“I will reveal the evidence once I return to Congress," ayon sa kongresista. — Llanesca T. Panti/FRJ GMA Integrated News
