Inirekomenda ng Field Investigation Bureau ng Ombudsman ang pagsasampa ng reklamong plunder at bribery laban kay Senador Rodante Marcoleta dahil sa pagtanggap umano nito ng P75 milyong campaign donations noong nakaraang taon.

Sa complaint-affidavit na nilagdaan noong Mayo 18, at eksklusibong nakuha ng GMA News, nais ng mga imbestigador na sampahan si Marcoleta ng reklamong plunder o pandarambong, kasama sina dating Quezon City 2nd District Representative Mike Defensor at dalawang iba pa na nagbigay ng donasyon kay Marcoleta.

“…the undersigned investigators respectfully pray that the following respondents Rodante Dizon Marcoleta and private individuals Michael Tan Defensor, Joseph Varias Espiritu, and Aristotle Baluyut Viray be indicted for Plunder, as defined and penalized under Republic Act No. 7080, and for violation of Presidential Decree no. 46,” nakasaad sa complaint affidavit.

Nais din ng mga imbestigador na kasuhan si Marcoleta ng indirect bribery.

Inatasan ang apat na magsumite ng kanilang counter-affidavits sa isinagawang preliminary investigation ng Ombudsman batay sa utos na nilagdaan noong Mayo 21.

Nag-ugat ang rekomendasyon sa naunang kaso noong nakaraang taon sa Commission on Elections (Comelec), kung saan iniimbestigahan si Marcoleta dahil sa hindi pagdedeklara ng donasyon sa kaniyang Statement of Contributions and Expenditures (SOCE).

Gayunman, walang inirekomendang kaso ang Comelec laban kay Marcoleta, dahil ang hindi pagdedeklara ay hindi na umano itinuturing isang election offense sa ilalim ng inamyendahang Omnibus Election Code.

Ngunit ayon sa mga imbestigador ng Ombudsman, dapat pa ring managot si Marcoleta.

“While respondent Marcoleta’s failure to declare the donations/contributions from respondents Defensor, Espiritu, and Viray did not constitute any election offense, his acts … should nevertheless give rise to criminal and administrative liabilities,” ayon sa complaint-affidavit.

Sa imbestigasyon ng Comelec, inamin umano ni Marcoleta na tumanggap siya ng tatlong magkakahiwalay na donasyon mula kina Defensor, Espiritu, at Baluyut noong Enero 2025 na may kabuuang halagang P75 milyon.

Nagbigay umano si Defensor ng P30 milyon, habang sina Espiritu at Viray ay nagbigay ng P25 milyon at P20 milyon, ayon sa pagkakasunod, sa magkakahiwalay na petsa noong Enero 6, 8, at 9, 2026.

“Respondent Marcoleta’s acceptance of gift with an aggregate amount of P75M on three separate occasions constitutes the crime of plunder,” nakasaad sa complaint-affidavit.

Itinuturing sina Defensor, Espiritu at Viray na mga co-conspirator.

Sa complaint-affidavit, inihayag ng mga imbestigador ng Ombudsman na ang P75M donation ay hindi na umano maikokonsiderang, “ordinary act of generosity but rather a corrupt act … the acceptance of such manifestly excessive amount should not be normalized among public officers.”

Sinisikap pa ng GMA News na makuhanan ng reaksyon sina Marcoleta, Espiritu at Baluyut.

Sa panig naman ni Defensor, kinuwestiyon niya ang motibo ng Ombudsman at iginiit na walang matibay na basehan ang mga kaso.

“How can it be plunder? No gov’t funds were involved. Dapat ‘yung pina-filean ng plunder, ‘yung totoong nagnakaw sa flood control project,” giit niya. — FRJ GMA News