Inihayag ni Secretary Mark Villar nitong Lunes na hanggang sa Martes na lang ang panunungkulan niya bilang pinuno ng Department of Public Works and Highways.
Sinabi ni Villar sa mga kawani at opisyal ng DPWH sa vitual flag ceremony nitong Lunes, inihayag niya na naghain na siyang resignation letter na epektibo sa Miyerkules.
“Today’s my last day after five years. I officially filed my resignation effective Wednesday, so I’ll be stepping down on Wednesday as your secretary,” sabi ni Villar na makikita sa kaniyang official Facebook page.
Hindi binanggit ni Villar kung bakit siya nagbitiw pero kasama ang pangalan niya sa listahan ng senatorial candidate ng administrasyon para sa 2022 elections.
Bago siya naging kalihim ng DPWH, naging kinatawan ng Las Piñas sa Villar, na pinamumunuan ngayon ng kaniyang kapatid na si Camille Villar.
Sa kaniyang farewell speech, nagpasalamat si Sec. Villar sa mga opisyal at kawani ng kagawaran na nakatulong niya para isagawa ang Build, Build, Build infrastructure program ng administrasyon.
“Kayo siguro ang tingin niyo sa akin rich kid… After these five years, I feel very rich because of all the friendships that I’ve made in this department. Kaya mayaman na mayaman na ako dahil sa inyong lahat,” ayon kay Villar, anak ni dating Senate President Manny Villar, na kinikilalang pinakamayamang negosyante sa Pilipinas.-- FRJ, GMA News
