Inihayag ni House Secretary General Reginald Velasco nitong Miyerkules na may 153 kongresista ang pumirma sa ika-apat na impeachment complaint laban kay Vice President Sara Duterte. Nakaabang naman ang mga kawani sa Senado sakaling aprubahan sa plenaryo ang reklamo at ipadala na sa kanila.

Sa panayam ng mga mamamahayag, sinabi ni Velasco na ipipresinta sa plenaryo ng Kamara ngayong hapon ang naturang impeachment complaint laban kay Duterte.

“Yeah, we have enough numbers, 102 lang ‘yung requirement. It was last reported na 153 na e but wala pa kaming exact number until we report it to the plenary,” saad ng opisyal.

"It will be presented to the plenary and once its approved, transmitted na agad sa Senate. Impeached is the term but, of course, she has to be tried by the Senate," dagdag niya.

 

 

Inihayag din ni Velasco na, "more signatures are coming."

May tatlong nauna nang impeachment complaints ang inihain laban kay Duterte noong December 2024. Kabilang sa mga basehan ng reklamo laban kay Duterte ang hindi umano maipaliwanag na paggamit nito ng confidential funds sa kaniyang tanggapan bilang vice president at noong kawani siya ng Department of Education.

Samantala, sinabi ni Senate Secretary Renato Bantug na inatasa na ang mga tauhan sa Senate Public Information Bureau (PRIB) na maghanda sakaling tanggapin nila ang impeachment complaint laban kay Duterte kung maaprubahan ng Kamara.

Pero sinabi ni Senate President Francis “Chiz” Escudero na hindi naghahanda "for anything regarding impeachment.”

“We cannot and will not assume anything until and unless it is a fact. The statements made by an over-eager staff was not authorized by me nor was it proper,” ayon kay Escudero.

Ngayon ang huling araw ng sesyon ng Kongreso bago magbakasyon para bigyan-daan ang kampanya kaugnay sa gaganaping Eleksyon 2025.

Kung maaaprubahan sa Kamara ang Articles of Impeachment laban kay Duterte, dadalhin ito sa Senado kung saan didinggin ang reklamo kung tuluyang patatalsikin sa puwesto bilang bise presidente o hindi si Duterte.-- FRJ, GMA Integrated News