Si Senador Erwin Tulfo ang magiging acting chairperson ng Senate blue ribbon committee, matapos ang pagbibitiw ni Senador Panfilo “Ping” Lacson sa puwesto, ayon kay Senate President Vicente “Tito” Sotto III ngayong Miyerkoles.
“Erwin is the vice chairman, therefore in the absence of the chairman, he automatically becomes chairman. He is automatically the acting chairman of the blue ribbon,” sabi ni Sotto sa isang ambush interview.
Sinabi ni Sotto na kasalukuyang nasa ibang bansa si Tulfo, ngunit magsasagawa sila ng pagpupulong sa komite pagbalik ng senador.
Nagbitiw si Lacson nitong Lunes bilang blue ribbon committee chairman, dahil hindi umano nasiyahan ang iba pang senador sa direksyon ng legislative inquiry sa umano'y maanomalyang flood control projects.
Una rito, inihayag ni Sotto na kabilang sa mga pinagpipilian na mamuno sa naturang komite sina Senador Joseph Victor "JV" Ejercito, Raffy Tulfo, Pia Cayetano, Francis "Kiko" Pangilinan, at Risa Hontiveros.
Tumanggi na sina Raffy (kapatid ni Erwin), Ejercito at Pangilinan na pamunuan ang naturang komite. – Jamil Santos/FRJ GMA Integrated News
