<iframe width="560" height="315" src="https://www.youtube.com/embed/khpr-fIjpR8?si=N3uiOfA_vIoLO2lL" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Naghain ng not guilty plea si Juliet Calvo, hepe ng maintenance division ng Department of Public Works and Highways- Region 4B, sa kasong graft na isinampa laban sa kaniya kaugnay ng P289 milyong substandard na flood control project, partikular na ang isang road dike, sa Oriental Mindoro nitong Martes.

Humarap si Calvo sa korte nang nakaposas, pero hiniling ng chairperson ng Sandiganbayan Fifth Division na si Associate Justice Zaldy Trespeses, sa mga awtoridad na tanggalin muna ang posas habang naghahain ng not guilty plea si Calvo.

Si Atty. Juanito Lim Jr., ang abogado ni Calvo na kumakatawan din sa anim na iba pang opisyal ng DPWH sa parehong kaso.

Kasama sa anim ang mga sumusunod:

Gene Ryan Altea, DPWH assistant regional director
Ruben D.S. Santos, DPWH assistant regional director
Montrexis Tamayo, DPWH OIC-chief, Planning and Design Division
Dominic Serrano, DPWH construction division chief and Bids and Awards Committee (BAC) chairperson
Dennis Abagon, DPWH OIC-chief, Quality Assurance and Hydrology Division, BAC regular member at
Lerma Cayco, DPWH accountant IV

Inihayag ni Atty. Lim nitong Martes na ang kaniyang pitong kliyente na mga opisyal ng DPWH ay sinuspinde ni Ombudsman Jesus Crispin Remulla dahil sa mga kasong administratibo na hinaharap nila kaugnay ng kaparehong kaso ng flood control.

Bukod sa katiwalian, nahaharap ang pito sa kasong malversation, kasama si dating Ako Bicol party-list Representative Zaldy Co, na sinasabing beneficial owner ng Sunwest Corporation na gumawa ng umano’y substandard na flood control project sa Oriental Mindoro.

Unang nagpiyansa si Calvo ng P90,000 para sa pansamantalang kalayaan ngunit muling ipinaaresto matapos amyendahan ng mga tagausig ng Ombudsman ang impormasyon para maisama siya sa kasong malversation na kinasasangkutan ng parehong proyekto sa flood control project. – Jamil Santos/FRJ GMA Integrated News