Nagsumite ng referral ang Independent Commission for Infrastructure (ICI) sa Office of the Ombudsman na nagrerekomenda ng panibagong listahan na mga dapat kasuhan kaugnay na umano’y anomalya sa flood control projects. Kasama sa mga pangalang binanggit si dating senador Bong Revilla Jr. Ang kampo ng actor-politician, sinabing hindi siya nabigyan ng pagkakataon ng ICI na magpaliwanag.
Sa press briefing nitong Miyerkoles, sinabi ni ICI chairperson Justice Andres Reyes Jr. na inirekomenda ng komisyon sa Ombudsman na sampahan ng kaso sina Revilla, negosyanteng si Maynard Ngu, Carleen Villa, Gerard Opulencia, Manny Bulusan, Ruel Umali, Gene Ryan Altea, J.Y. Dela Rosa, Mrs. Patron, at Carlo Aguilar.
“Ang posibleng mga kaso ay direct or indirect bribery at corruption of public officials, plunder, and administrative sanctions, amongst others,” ani Reyes.
Nauna nang itinanggi ni Revilla ang alegasyon na tumanggap siya ng kickback mula sa flood control projects.
Sa isang pahayag nitong Miyerkoles, sinabi ni Atty. Maria Guinto, abogado at tagapagsalita ni Revilla, na hindi nabigyan ng ICI ng pagkakataon ang dating senador na ipagtanggol ang sarili.
Ayon kay .Guinto, nakahanda si Revilla na humarap sa ICI pero hindi umano ito ipinatawag sa pagdinig.
“Yet he was never invited to speak, never given the opportunity to defend himself, and never allowed to present the truth,” saad ni Guinto sa pahayag.
“He is deeply disappointed to have been denied such a fundamental right, though he still holds trust and faith in the system,” dagdag niya.
Ayon kay Reyes, ang referral na ipinadala nila sa Ombudsman ay base sa affidavits at testimonya ni dating DPWH Undersecretary Roberto Bernardo.
Dati nang inakusahan ni Bernardo si Revilla na tumanggap umano ng 25% na halaga ng komisyon mula sa pondong inilaan sa flood control projects, bagay na itinanggi naman ng dating senador.
Sinabi ni Guinto, na tiwala si Revilla na lalabas ang katotohanan.
“[T]he allegations against him are based on the meaningless accusations fabricated by a criminal mastermind and his cohorts who are desperately buying their way to freedom,” ani Guinto.
“The assertions of those whose conduct reflects a deliberate pattern of moral bankruptcy are suspect at best, and should not, in any manner, be construed as drawing our client into the web they themselves engineered,” dagdag niya.
Ayon pa kay Guinto, sasagutin ni Revilla ang mga alegasyon kapag binigyan siya ng Ombudsman ng kaniyang karapatan para magsagawa ng preliminary investigation.
Patuloy pa ang imbestigasyon
Samantala, inirekomenda naman ng ICI sa Ombudsman na magsagawa pa ng imbestigasyon kaugnay ng pagkakasangkot ng mga pangalan nina Senator Francis “Chiz” Escudero, dating senador Nancy Binay, dating Senate finance chairperson Grace Poe, at Senador at dating Department of Public Works and Highways (DPWH) secretary Mark Villar, tungkol sa umano’y anomalya sa flood control projects.
“Because of the gravity of the allegations, the commission also recommends that the following individuals be referred to the OMB for further investigative review and case build up with the understanding that any additional evidence obtained by this commission will be submitted immediately,” ani Reyes.
Sinabi ni Reyes ang referral ay batay pa rin sa mga affidavit at testimonya ni Bernardo.
Ayon kay Reyes, kailangan ng ICI ng mga testigo pagdating sa iba pang senador na isinasangkot sa katiwalian.
“Mga driver, mga katulong, kusinera, butler, secretary, accountant. We need more witnesses,” saad niya.
“And then, pangalawa, we are not washing our hands from these cases. We are just joining hands with the Ombudsman. In the meantime that they are investigating, we are also investigating. So two heads are better than one,” dagdag ni Reyes.
Sa mga naunang pahayag ng mga pangalang nabanggit, itinanggi rin nila ang paratang na sangkot sila sa sinasabing anomalya sa pondo ng flood control projects.
Kaugnay nito, sinabi ni Reyes na magsusumite ang ICI ng karagdagang ebidensiya na maaaring maging daan para sa pagsasampa ng karagdagang kaso laban kina dating DPWH secretary Manuel Bonoan, dating DPWH undersecretary Roberto Bernardo at Catalina Cabral, dating congressman Zaldy Co, Commission on Audit Commissioner Mario Lipana, at dating Bulacan district engineer Henry Alcantara, at dating assistant district engineers na sina Brice Hernandez at Jaypee Mendoza. — Joahna Lei Casilao/FRJ GMA Integrated News
