Dahil sa paghupa ng krisis sa Middle East dulot ng sigalot ng Amerika at Iran, may maaasahan na malakihang tapyas sa presyo ng mga produktong petrolyo sa susunod na linggo. Alamin kung magkano.
Batay sa galaw ng kalakalan ng Mean of Platts Singapore (MOPS) at sa average ng palitan ng salapi (foreign exchange) sa nakalipas na apat na araw, sinabi ng isang source mula sa industriya ng langis na inaasahang mababawasan ng P4.50 hanggang P5.00 per liter ang diesel, at P4.50 hanggang P5.00 per liter naman sa gasolina.
“Oil price retreated as renewed hopes of a diplomatic breakthrough to the US-Iran conflict eased the geopolitical risk premium, despite the lingering uncertainty and persistent risks to Red Sea shipping,” ayon sa source.
“Fuel products declined in line with crude, with Asian diesel and gasoline falling sharply as easing geopolitical risks reduced the recent supply premium,” dagdag nito.
Inaanunsyo ng mga kumpanya ng langis ang mga pagbabago sa presyo ng mga produktong petrolyo tuwing Lunes, at ipinatutupad kinabukasan ng Martes.
Ngayong linggo, nagkaroon ng bahagyang rollback sa presyo ng mga produktong petrolyo na P0.73 kada litro sa gasolina, P0.60 kada litro sa diesel, at P2.09 kada litro sa kerosene.
“The stronger peso this week against the US dollar helped put more downward pressure on domestic prices,” paliwanag din ng industry source. —FRJ GMA News
