Nagkomento si Kapuso Drama King Dennis Trillo sa mga daring at intimate scenes ng girlfriend niyang si Jennylyn Mercado sa MMFF entry na "All Of You," kung saan partner ng aktres ang aktor na si Derek Ramsay.
Sa naturang pelikula, may ilang love scenes sina Jennylyn at Derek, kung saan nag-topless pa umano ang aktres.
Hindi pa raw napapanood ni Dennis ang pelikula, pero suportado niya si Jen sa mga proyekto nito.
"Nandu'n palagi 'yung suporta ko sa kaniya. Hindi ko man mapanood, siguro may ma-miss ako pero lagi akong nakasuporta," ani Dennis.
Wala naman daw selos na naramdaman si Dennis kina Jen at Derek. "Oo naman, trabaho."
"Siyempre, well eksena 'yun na kailangan mong gawin so wala naman sigurong kailangang ikagalit du'n or pag-awayan dahil siyempre 'yun 'yung nagbabayad sa mga bills namin. Trabaho 'yan eh," dagdag pa ni Dennis.
Pinakamagandang Christmas gift
Hindi naman sinabi ni Dennis ang Christmas gift na ibinigay sa kaniya ni Jennylyn. Aniya, ito raw ang pinakamagandang Christmas gift na natanggap niya nitong 2017.
"Siguro gift ni Jen sa akin. Hindi ko na lang sasabihin pero siya kasi 'yung tao na talagang sobrang galante niya na pinag-iisipan niyang mabuti kung ano 'yung bagay na 'pag natanggap mo, matutuwa ka talaga. So 'yun."
Masaya si Dennis na nakasama niya si Jen noong bisperas ng Pasko.
"Kainan lang sa mga kani-kaniyang bahay. Pumunta kami sa kanila, tapos sila naman pumunta sa amin, nu'ng 24."
Hindi pa raw sila masyadong nakakapag-celebrate ng New Year, pero may balak silang mag-out of town.
"New Year naman, kainan pa rin, siyempre puro fiesta eh. Pero hindi kami masyadong nakapag-quality time nu'ng New Year dahil may kani-kaniya kaming ginawa pero meron kaming trip na gagawin. Out of town," dagdag ni Dennis. — MDM, GMA News
