Inihayag ni Department of Foreign Affairs (DFA) Secretary Teddy Boy Locsin na bubuksan na sa March 14 ang Courtesy Lane  sa DFA Aseana para sa mga overseas Filipino worker na kukuha ng pasaporte.

Sa Twitter posts nitong Martes, sinabi rin ng kalihim na hindi na bibigyan ng passport slots ang mga recruiter.

"Recruiters will no longer be given passport slots. They will have to go online like everyone else. This won't affect OFWs," ayon kay Locsin.

"From March 14, OFWs will be able to walk-in w supporting docs. This should make passport appointments easier and as it should be, ABSOLUTELY FREE for ALL," patuloy niya.

 

 


Marami sa mga nagkomento ang natuwa sa pahayag ni Locsin, at nagulat nang malaman na mayroon palang prebilehiyo na passport slots ang mga recruiter.

Sa harap ito ng mga reklamo ng pahirapan ang makakuha ng slots sa online reservation sa website ng DFA para sa schedule sa pag-apply ng passport.

Bukod pa rito ang mga reklamo na mayroon mga netizen na nag-aalok na tutulong makakuha ng slot sa online appointment kapalik ng malaking halaga.

Sa hiwalay na post ni DFA Undersecretary for Civilian Security and Consular Affairs Dodo Dulay, sinabi niya na iniutos ni Locsin na itigil na ang alokasyon sa passport appointment ng mga recruiter dahil "some can’t handle the temptation."

 

 


Sa isa pang tweet, sinabi ng kalihim na sa hapon lang muna bukas ang Passport Courtesy Lane para sa walk-in applicants simula sa March 14.

"Afternoons only for the meantime but it will be whole day and whole country soon. I thanked them all for their service; that barely makes up for their sacrifices," sabi ni Locsin sa post na makikita ang larawan ng tanggapan ng courtesy lane.

May nagkomento rin na sana ay payagan din ang mga senior citizen sa bilang walk-in applicant sa pagkuha ng pasaporte.

Tugon dito ng kalihim: "Puwede na after March 14. See my tweet re our Courtesy Lane after this one. Wish granted."

--FRJ, GMA News