Isang babae ang naputulan ng binti nang maaksidente sa sinasakyan niyang motorsiklo habang papunta sa voting precinct sa Davao City para bumoto nitong Lunes.

Kinilala ang biktima na si Jean Pagas, na naipit umano ang paa nang sumabit sa kadena ng gulong ng motorsiklo ang kaniyang palda.

Ayon sa ulat ni GMA News' Joseph Morong, sinabi ng mister ng biktima na nakasakay sila sa motorsiklo at papunta sa Sixto Babao Elementary School dakong 8 a.m. nang mangyari ang insidente.

 

 

Samantala sa Marawi City, nagkaroon ng tensiyon sa isang voting precinct nang magsuntukan ang dalawang lalaki.

Ayon kay GMA News' Sandra Aguinaldo, tagasuporta ng magkalabang kandidato sa pagka-bise alkalde ang dalawang lalaki.


Nagkaroon din ng tensyon sa voting center sa Barangay Rosary Heights-10 sa Cotabato City nang magkagulo ang mga poll watcher ng ilang kandidato.

 

 


Apat ang inaresto ng mga awtoridad at tatlo naman ang nasugatan at dinala sa ospital dahil sa naturang kaguluhan.-- FRJ, GMA News