Makalipas ang dalawang taon ng pagkansela ng dahil sa pandemya, ngayong araw ay muling ipinagdiwang ang makulay at masayang Pahiyas Festival sa bayan ng Lucban, Quezon.
Ang Pahiyas Festival ay ipinagdiriwang sa karangalan ng patron ng mga magsasaka na si San Isidro Labrador.
Ito ay pasasalamat ng mga taga Lucban sa masaganang ani. Kilala ang bayan ng Lucban sa mga produktong agrikultura dahil sa mayaman nitong lupa. Nasa paanan ng bundok Banahaw ang bayan.
Ang Pahiyas Festival ay pinaghahandaan ng mga taga Lucban. Ibinibida dito ang kanilang mga inaning gulay, prutas at palay. Ipinapakita rin dito ang pagiging malikhain ng mga taga Lucban dahil sa magarbong mga dekorasyon sa bawat tahanan.
Tampok ang Kiping o Rice Paper na pangunahing ginagamit na pahiyas o palamuti. Ang Kiping ay bigas na malagkit na giniling at hinulma sa dahon upang magkaroon ng disenyo.
Ang mga bahay ay pinuno ng iba’t ibang aning gulay at prutas. Lahat ng turista na talagang busog ang mata sa ganda ng mga pahiyas.
Hindi rin mawawala ang mga ibinibentang produkto ng bayan ng Lucban kabilang na ang sikat at masarap na Longganisang Lucban.
Sa mga oras na ito ay patuloy parin ang pagdagsa ng mga tao.
Tiniyak ng pamahalaang lokal ng Lucban na ligtas sa COVID-19 ang makikisaya sa Pahiyas Festival. Lahat ay hinahanapan ng vaccination card at sinusuri muna ang temperatura.
Mamayang hapon nitong araw ng Linggo, ay isasagawa ng banal na Misa at prusisyon ng imahe ni San Isidro Labrador. —LBG, GMA News
