Nagkaroon ng kaguluhan sa isang lugar na may mga namamanata sa Mabalacat, Pampanga matapos habulin ng mga nagpepenitensya ang isang lalaki na lasing umano na nambato sa kanila ng bote.
Sa ulat ng GMA Integrated Newsfeed, makikita ang video na ini-upload ni Micky Bells, kaugnay sa nangyaring insidente noong Huwebes Santo.
Ayon kay Micky Bells, sinubukan umano ng mga nagpepenitensya na huwag pansinin ang lasing pero hindi umano ito tumigil sa pagti-trip.
Nang makarating sa pabasa ang mga nagpepenitensya at nakaluhod, naghagis umano ng bote ang lasing at doon na nagkaroon ng kaguluhan.
Pati ang mga nanonood ng penitensya, napatakbo na rin.
Ang panghataw ng mga negpepenitensya sa kanilang likod, ginamit nilang panghataw sa lasing.
Nahuli rin kalaunan ng mga awtoridad ang lalaki at dinala sa police station.
Pero gaya ng mensahe ng Mahal na Araw na magpatawad, nagkapatawaran ang magkabilang panig at wala nang nagsampa pa ng reklamo. -- FRJ, GMA Integrated News
