Social media ban sa mga bata, dapat nga bang isulong ng mga mambabatas?

Inalmahan ng maraming netizens ang pahayag ni Senador Robin Padilla na inilarawan niyang "weak" ang mga kabataan ngayon. May kinalaman nga ba rito ang social media na isinusulong ng ilang mambabatas sa Pilipinas na i-ban sa mga menor de edad? Alamin.

“Ang mga bata po ngayon, sad to say, ‘wag kayo magagalit sa akin. Naku, maraming batang magagalit siguro pero pasensya na kayo—you are weak. Hindi kayo katulad noong panahon namin na hindi kami iyakin,” sabi ni Padilla sa nakaraang pagdinig ng Senate Committee on Public Information and Mass Media.

“Noong panahon namin, hindi uso ‘yung salitang depression. Hindi ko nga alam kung ano ‘yung depression. Ngayon, batang maliit sasabihin, ‘I’m depressed,’” dagdag pa ni Padilla.

Makaraang ihayag ng netizens ang kanilang mga negatibo saloobin sa sinabi ni Padilla, nagbigay ng pahayag ang senador.

“Ang henerasyon ko, hindi naging weak at hindi naging sikat ang salitang depression dahil wala ang social media. Seryoso ang suliranin sa masamang epekto ng social media sa kabataan na dapat ay hinaharap nating lahat katulad ng pagharap ng mga bansang progresibo,” ani Padilla.

Sa pagdinig ng komite, iminumungkahi ang paglalagay ng age limit sa mga puwedeng gumamit ng social media.

“Ako po ay isa sa mga senador na sumasang-ayon na i-ban ang social media sa mga menor de edad 16 and below. Ang Pilipinas po ang bullying capital of the world. Itong bullying capital of the world na ito, hindi lang po sa physical bullying, kundi sa cyberbullying. Sa social media, doon sila nag-aaway-away, iniinsulto ang isa’t isa,” sabi ni Senador Win Gatchalian.

Batay sa Young Adult Fertility and Sexuality Study, 92% ng mga kabataang Pilipino ang may smartphone, kung saan 9 sa bawat 10 kabataan ang may access sa Internet at 89% ang may social media account, na karamihan ay nasa Facebook.

Base sa mga batang na-survey, 1 sa bawat 5 sa kanila ang nagsabing may kilala silang nakaranas ng harassment online.

Noong 2019, inilabas naman ng UNICEF ang pag-aaral nila na isa sa bawat tatlong kabataan mula sa 30 bansa ang nagsabing nakaranas sila ng cyberbullying.

Sa Pilipinas naman, halos kalahati ng mga batang edad 13-17 ang naaapektuhan ng cyberviolence.

Mula sa mga na-survey ng UNICEF mula sa 30 bansa, 32% ang naniniwalang gobyerno ang responsable sa pagtugon sa online bullying, habang 31% ang nagsabing mga kabataan ang may pananagutan, habang 29% ang naniniwalang Internet companies ang dapat umako ng responsibilidad.

“Parents of children will come to me because the kids were being bullied online using Facebook as the platform. And the parents have been calling Facebook and said, ‘Facebook, please take it down because my kids, our kids can no longer take it. And my kids, our kids are already depressed,’” sabi ni Senador Raffy Tulfo.

Depensa naman ng Meta, na siyang parent company ng Facebook, hindi kailangang i-ban sa social media ang mga menor de edad.

“We do think that the need for a ban is not there given that the children have a right to access digital platforms. However, we want to make sure that they are protected” sabi ni Berni Moestafa, head ng Meta’s Public Policy for Indonesia and Philippines.

May ginagawa na raw na hakbang ang Meta upang protektahan ang mga kabataan sa kanilang platform.

“We launched what we recently called ‘Teen Accounts,’ and I can go a little bit into details on Teen Accounts but overall, what we’re trying to say is that this is a process of improvements,” sabi ni Moestafa.

Noong Disyembre 10, 2025, inumpisahang ipatupad sa Australia ang social media ban sa mga kabataang 16-anyos pababa, na may saklaw na 10 platforms.

Pinagmumulta ang mga kompanyang hindi sumunod sa ban ng hanggang 49.5 million Australian dollars o mahigit P2 bilyon.

Aprubado na rin sa unang pagbasa sa Portugal ang panukala kung saan kinukuha ang parental consent bago maka-access ng social media ang mga batang edad 13-16 anyos.

Balak na rin ng Denmark na ipatupad ang social media ban para sa users na wala pang 15-anyos.

Plano na rin itong gawin ng mga mambabatas sa France kasama ang rekomendasyong ipatupad ang “digital curfew” para sa mga edad 15 hanggang 18-anyos.

Kung maipatutupad, aalisan sila ng Internet access mula 10 p.m. hanggang 8 a.m.

May panukala naman sa Spain kung saan kinakailangan ng social media companies na ipatupad ang ban kasama ang mas mahigpit na age verification systems.—FRJ GMA Integrated News