Nabuwag ng mga awtoridad sa Vietnam ang grupo umano na nangunguha ng mga pusa para katayin at ginagawang pagkain ang karne. Umabot sa 400 pusa ang nasagip at 40 sa kanila ang naibalik sa kani-kanilang mga amo, ayon sa isang animal rights group nitong Martes.

Sa ulat ng Agence France-Presse, sinabing siyam na tao ang inaresto na iniuugnay sa isang "criminal group specializing in stealing and collecting cats", ayon sa official newspaper ng Ho Chi Minh City police.

Nasagip ng mga awtoridad ang mahigit 400 buhay na pusa, at may nakuha pang 80 pusa na patay na at nakaimbak sa yelo. May nakuha pa umanong karagdagang 21 pusa mula sa isa pang pasilidad.

Legal ang pagkain ng aso at pusa sa Vietnam, at marami ang restaurant na hayagang nag-aalok ng karne ng mga ito. Gayunpaman, kinakailangang magkaroon ang mga nagbebenta ng karne ng mga hayop ng sertipikasyon na nagpapakita kung saan galing ang mga hayop.

Ayon sa pulisya, sinalakay nila ang grupo matapos makatanggap ng maraming ulat ng pagnanakaw ng mga alagang hayop sa Ho Chi Minh City. Inamin umano ng mga suspek na tatlong taon na silang nanghuli ng mga pusa sa iba’t ibang katimugang bahagi ng Vietnam.

Hindi bababa sa 40 sa mga ninakaw na alagang hayop ang naibalik sa kani-kanilang mga may-ari, ayon sa Humane World for Animals sa isang pahayag noong Martes.

Pinuri nito ang pulisya sa ginawang aksyon upang mailigtas ang buhay ng napakaraming hayop.

Gayunman, nasa 100 nasagip na pusa ang namatay din kalaunan dahil sa paghihirap na kanilang dinanas sa pagkakabihag.

"While efforts are continuing to reunite stolen cats with their families, our main concern is for the cats who remain at the police station as evidence during the prosecution," saad sa pahayag ni Karanvir Kukreja ng Humane World for Animal.

Nagbigay umano ang grupo ng pagkain at inaasikaso na ang pagdala ng mga bentilador sa kinaroroonan ng mga pusa upang hindi sila labis na mainitan.

Hindi naman umano kaagad tumugon ang Ho Chi Minh City police ng hingan ng pahayag, ayon sa AFP. — ulat mula sa Agence France-Presse/FRJ GNA News