Nag-viral kamakailan ang post ng isang ginang na umabot sa P4 milyon ang gastusin sa ospital matapos magka-brain hematoma umano ang kaniyang asawa, na isang PhilHealth contributor. Ngunit hindi nila nakuha ang benepisyo dahil pumanaw ang kaniyang mister bago pa man umabot sa 24 oras ang paglalagi nito sa ospital.

May ilan pang kababayan na hindi rin nakakuha ng buong benepisyo dahil sa ganitong patakaran.

Sa nakaraang episode ng “Kapuso Mo, Jessica Soho,” matatandaang marami ang nakisimpatiya sa naturang ginang matapos pumanaw ang kaniyang mister bago pa siya makabuo ng P1 milyong hinihinging deposito ng ospital.

Bisperas pa man din iyon ng college graduation ng kanilang anak.

Ikinasama ng loob ng ginang na sa kabila ng 25 taon na paghuhulog ng kaniyang mister sa PhilHealth, sinabi umano sa kanila ng dalawang ospital na hindi nila makukuha ang PhilHealth benefits dahil masyado itong maagang pumanaw o wala pang 24 oras na naka-confine sa ospital.

Batay sa 24-hour confinement policy ng PhilHealth, karaniwang ibinibigay lamang ang ilang benepisyo sa mga pasyenteng naka-confine kapag umabot ng hindi bababa sa 24 oras ang kanilang pananatili sa ospital, maliban sa ilang exceptions at emergency cases.

Ilan pang kababayan ang nagkuwento na ganito rin ang sinapit ng kanilang mga mahal sa buhay sa ilalim ng naturang patakaran.

Batang may acute viral myocarditis

Si Karla Clarissa Sales, isang ina mula sa Talavera, Nueva Ecija, ay nakatanggap ng tawag noong Oktubre 7 na dinala sa ospital ang kaniyang anak na si Zoe, na pumasok noon sa eskuwela.

“Nawalan po ng malay si Zoe, nagsi-seizure daw. Nakita ko na lang po ‘yung anak ko na nasa bed, nakahiga. Tapos naka-oxygen na po siya. Unstable po ‘yung BP (blood pressure), kaya nahihirapan huminga,” kuwento niya.

Kalaunan, natuklasan na may acute viral myocarditis si Zoe, isang kondisyon kung saan namamaga ang puso, kaya kinailangan siyang maipasok agad sa PICU o Pediatric Intensive Care Unit.

Ngunit dahil walang PICU ang unang ospital na pinagdalhan sa kaniya, inilipat si Zoe sa isang private hospital sa Cabanatuan City, Nueva Ecija, kung saan siya tuluyang binawian ng buhay.

“Tapos po nung kinausap kami nu’ng pedia cardio niya, sinabi po na critical daw po. ‘Yung huling dalaw ko po sa kaniya, buhay pa siya. Kinantahan ko pa po siya ng kanta namin," sabi ni Karla.

"Umiiyak ‘yung anak ko. Lumabas po ‘yung doktor, sinabi, nire-revive na lang po si Zoe. Hanggang 10 lang daw po puwede. Nanghina na po ako, Ma’am. Hindi ko na po alam kung anong gagawin namin do’n,” dagdag pa niya.

Noong Oktubre 8, 2025, pumanaw si Zoe.

Dahil sa private hospital siya nailipat, dito na nabutas ang kanilang bulsa nang umabot sa mahigit P100,000 ang hospital bill, kahit wala pang 24 oras na naka-confine si Zoe.

Ikinasama ng loob ni Karla na hindi niya napakinabangan ang halos limang taon niyang kontribusyon sa PhilHealth.

“Tinanong ko po ‘yung PhilHealth sa ospital kung bakit P7,000 hanggang P8,000 lang. Dahil wala pa raw pong 24 hours na naka-admit ‘yung bata nang mag-decease siya, resuscitation package lang po ang maibibigay nila,” ani Karla.

“Ang sabi ko po talaga, ‘Ano ‘yun, Ma’am? Hihintayin muna ng tao ‘yung 24 hours bago mamatay?’ Dapat po pala sinabi ko sa anak ko na, ‘O wait lang, huwag ka muna mamatay, wala ka pang 24 hours,’” dagdag niyang reklamo.

Ikinadagdag pa ng kaniyang pagkadismaya na may balanse pa sila sa funeral service ni Zoe.

“Ang hirap maging mahirap sa Pilipinas. Durog ka na, dinudurog ka pa. Nag-aayos ako ng papel habang nakaburol ‘yung anak ko para lang makakuha ng tulong sa gobyerno,” emosyonal na sabi ni Karla.

Partner na nagkaroon ng embolism

Si Edwin Macapagal naman, taga-Parañaque, ay nagka-camping noong Pebrero kasama ang partner niyang si Lorraine sa Tanauan nang bigla itong tumumba.

Agad niya itong isinugod sa isang private hospital sa Tanauan.

Dahil kinailangang ipasok sa ICU o intensive care unit si Lorraine, inilipat siya ni Edwin sa isa pang private hospital sa Parañaque, malapit sa kanilang bahay.

“From Batangas na sinasabi nilang pneumonia, pagdating dito sa Parañaque, naging embolism na siya. Nagkaroon ng clot doon sa lungs niya kaya hindi na makapag-produce ng tamang oxygen. ‘Yun ‘yung naging cause nu’ng heart attack,” kuwento ni Edwin.

Ngunit bago pa makabitan ng tubo si Lorraine, bumigay na ang katawan nito.

Bago ito, 16 na taon nagtrabaho bilang hotel employee si Lorraine at walang mintis sa kaniyang paghuhulog sa PhilHealth.

Umasa sina Edwin na magagamit nila ito sa pinagdaanang medical emergency ni Lorraine dahil malaki ang kanilang hospital bill.

“Nag-ask ako, bakit walang discount ang PhilHealth? Ang sabi nila, hindi raw kasi umabot ng 24 hours sa kanila,” sabi ni Edwin.

Samantala, sa ikalawang private hospital na pinaglipatan nila kay Lorraine, umabot sa halos P200,000 ang bill. Hindi rin umabot sa 24 oras ang confinement ni Lorraine kaya hindi rin ito na-cover ng PhilHealth.

“So, anong nag-suffer du’n? ‘Yung savings namin. 16 years mong pinagtrabahuhan ‘yun na hindi mo siya nagagamit. Kinakaltas siya sa kinikita mo buwan-buwan," ani Edwin.

"Bago dumating ‘yung sweldo mo, nauna mo nang bayaran ‘yun. And then, nandu’n ka na nilalaban mo ‘yung buhay mo, sasabihin sa’yo wala kang makukuha kasi hindi kayo inabutan ng 24 hours na buhay,” emosyonal na sabi pa niya.

Paliwanag ng PhilHealth

Nakipag-ugnayan ang KMJS sa PhilHealth. Hindi sila nagpaunlak ng on-cam interview ngunit nagpadala sila ng statement.

“Thank you for reaching out to give PhilHealth the opportunity to speak on this topic. It is imperative for us to review our policies and ensure that Filipinos are supported by PhilHealth especially in their time of need,” ayon sa pahayag.

“We will now focus on ensuring this is acted upon and bring this discussion up to our board for immediate consideration. We will keep you updated once we have significant progress on this. Thank you!”

Samantala, sa naging panayam ng GMA News kay PhilHealth spokesperson Dr. Israel Francis Pargas, ipinaliwanag niya ang ilang detalye hinggil sa kanilang polisiya.

“Matagal nang polisiya ‘yan. Actually, kung ang ating confinement is less than 24 hours, ang polisiya dati is it’s not compensable,” sabi niya.

Ngunit noong nakaraang taon, inilabas ang PhilHealth Circular No. 2024-0033 kung saan nakasaad na hindi na kinakailangan ang mahigit 24-hour confinement. Sakop na ito ng tinatawag na Outpatient Emergency Care Benefit.

Umamin ang PhilHealth na maaaring nagkaroon ng pagkakamali sa kaso ng pamilyang nasa viral post.

“Siguro nagkaroon lang po ng misinterpretation. Hindi ko po alam kung ito ay sa ospital o sa amin din mismo, dahil baka kailangan nating i-check,” sabi ni Pargas.

Nakikipag-ugnayan na rin ang PhilHealth upang matulungan ang ginang sa viral Facebook post para makuha ang benepisyo ng yumaong mister.

Samantala, matagal na ring isyu ng private hospitals ang hindi umano pagbabayad ng PhilHealth sa kanilang mga claims.

Ayon sa ilang private hospitals, nalulugi na sila dahil sa hindi pagbabayad ng PhilHealth.

Nanawagan si Dr. Tony Leachon, na matagal nang kritiko ng PhilHealth at ng mga polisiya nito, na tuluyan nang alisin ang 24-hour confinement rule.

“Ang sakit na heart attack, stroke, puwede kang mamatay talaga even in one hour. Covered ka dapat. Bakit maghihintay ka pa ng 24 oras, eh patay ka na? Hindi siya makatao. Ang problema natin sa kalusugan is basically because of underfunding," aniya.

Ang mga Pilipino umano ang may pinakamaikling lifespan sa Asia dahil sa kakulangan sa healthcare, ayon kay Leachon.

Aminado naman ang PhilHealth sa mga nakita ng pamunuan na kailangang baguhin sa sistema nito.

“As part of moving forward, we will have the reorientation of our healthcare providers on such policies. Also, we will have the reorientation to our people,” dagdag ni Pargas.—MCG GMA News