Mananatiling lider ng Senado si Francis “Chiz” Escudero, habang si Leyte Representative Martin Romualdez pa rin ang Speaker sa Kamara de Reprsentantes sa 20th Congress.

Sa pagbubukas ng magkahiwalay na sesyon ng dalawang kapulungan ng Kongreso nitong Lunes, bumoto ang 19 na senador upang manatiling Senate President si Escudero.

Kabilang sa mga bumoto para kay Escudero ang tinaguriang “Duterte bloc.” Nakuha rin niya ang suporta ng mga balik-Senado na sina Francis “Kiko” Pangilinan at Bam Aquino.

Samantala, limang senador ang bumoto kay Sen. Tito Sotto para sana maging lider ng Senado. Kinabibilangan ito nina Risa Hontiveros, Juan Miguel “Migz” Zubiri, Loren Legarda, at Panfilo "Ping" Lacson.

Dahil natalo sa labanan sa posisyon ng Senate president, magiging minority leader si Sotto.

Samantala, nahalal si Sen. Jinggoy Estrada na Senate president pro tempore, at si Sen. Joel Villanueva naman ang Senate majority leader.

“We should not and cannot respond to every comment. We should rise above any anger, resentment, and bitterness we may have. We should move on, move forward, and must continue to do our job,” saad ni Escudeto sa kaniyang talumpati.

“We should not and cannot bow to a mob. We will not be cowed by the shrillest of voices. We will stand up for what is right, what is just, and what is consistent with the Rule of Law and our Constitution. That we disagree does not mean that you are right and I am wrong, or that I am right and you are wrong,” dagdag niya.

Walang kalaban si Romualdez

Sa Kamara, walang nakalaban si Leyte Rep. Martin Romualdez sa posisyon bilang Speaker o lider ng mga kongresista.

Nakakuha siya ng 269 boto matapos ang nominasyon mula sa iba’t ibang partido ng:

    Party-list Coalition na kinatawan ni  TUCP party-list Rep. Raymond Democrito Mendoza

    Lakas-CMD na kinatawan ni Quezon Rep. Jayjay Suarez

    Nationalist People’s Coalition na kinatawan ni Quezon Rep. Mark Enverga

    Nacionalista Party na kinatawan ni Misamis Oriental Rep. Yevgeny Emano

    National Unity Party na kinatawan ni Antipolo Rep. Ronaldo Puno

    Partido Federal ng Pilipinas na kinatawan ni Ilocos Norte Rep. Ferdinand Alexander Marcos.

"I rise today to nominate a man whose leadership has been tested, proven, and deeply felt across this chamber and beyond: the Honorable Ferdinand Martin G. Romualdez. In the 19th Congress, Speaker Romualdez steered this institution with both resolve and wisdom," ayon kay Suarez.

"Under his stewardship, the House of Representatives became a true House of the People — responsive to the needs of the nation, attuned to the voice of the common Filipino, and anchored in the values of unity, service, and progress," dagdag niya.

Umabot sa 291 na kongresista – kabilang si dating pangulo at ngayon ay Pampanga Rep. Gloria Macapagal Arroyo-- sa mga pumirma sa manifesto of support para kay Romualdez upang gawing Speaker.

Ang mga hindi bumoto kay Romualdez, pipili ng kanilang magiging lider para sa minority group.— mula sa ulat nina Gisella Ombay/Llanesca T. Panti/FRJ GMA Integrated News