Inalis ng World Boxing Organization ang WBO world bantamweight belt sa Pinoy boxer na si John Riel Casimero.
Napanalunan ni Casimero, 31-4 na may 21 knockouts, ang naturang titulo nang talunin niya si Zolani Tete noong 2019.
Dalawang ulit na matagumpay na naidepensa ni Casimero ang titulo, na ang pinakahuli ay noong nakaraang Agosto laban kay Guillermo Rigondeaux.
Muli sanang idedepensa ni Casimero ang titulo laban kay Paul Butler noong Disyembre sa Dubai pero hindi natuloy nang magkasakit ng gastritis ang Pinoy.
Muling itinakda ang kanilang laban sa Abril 22 pero hindi na naman natuloy matapos na labagin umano ni Casimero ang patakaran ng British Boxing Board of Control na bawal magbawas ng timbang sa pamamagitan ng paggamit ng "sauna."
Ipinalit kay Casimero ang kapuwa Pinoy boxer na si Jonas Sultan para sa WBO interim bantamweight title pero natalo via unanimous decision kay Butler.
“The Committee unanimously recommended to the WBO Executive Committee to strip John Riel Casimero’s WBO World Bantamweight Championship Title for failure to comply with the conditions set forth in its Resolution,” ayon sa resolusyon ng WBO.
Dahil dito, si Butler na ang magiging opisyal na kampeon sa naturang dibisyon mula sa pagiging "interim" champ.
Magiging no. 1 contender naman sa titulo si Casimero.
“The WBO World Championship Committee recommends to the WBO Ratings Committee that John Riel Casimero be rated at the number one (1) position in the WBO Bantamweight Rating Ratings and subject to complying with the applicable rating criteria,” ayon sa resolusyon.
.—FRJ, GMA News
