Jose Calida, wala na sa COA, ayon kay ES Bersamin

Nagbitiw na bilang chairman ng Commission on Audit (COA) si Jose Calida, ayon kay Executive Secretary Lucas Bersamin.

Una rito, hindi rin kasama si Calida sa mga opisyal na muling nanumpa sa kani-kanilang posisyon nitong Martes sa Palasyo.

Kinailangan na muling manumpa ang mga nasabing opisyal makaraang hindi makalusot sa Commission on Appointment (CA) ang kanilang kompirmasyon bunga ng kakulangan ng panahon.

Naglabas din ng abiso nitong Martes ng umaga ang COA na nagsasabing magtatapos ang termino ni Calida bilang pinuno ng komisyon ngayong araw, October 4, dahil sa hindi na siya muling itinalaga sa puwesto ni Pangulong Ferdinand "Bongbong" Marcos, Jr.

"Please be advised that the chairperson was one of the officials whose appointment was bypassed by the Commission on Appointments. Today, the President issued reappointment to 10 cabinet members, unfortunately, Chair Calida was not one of those reappointed," sabi ng Public Information Office ng COA sa ipinadalang email sa GMA News Online.

"The Commission (COA) will wait for the President’s appointment of a new Chair for COA. We hope we have cleared up the matter," dagdag ng COA.

Kabilang sa mga muling pinanumpa ni Marcos sa kani-kanilang posisyon ay sina:

• Benjamin Estoista Diokno - secretary of the Department of Finance
• Manuel Manligas Bonoan - secretary of the Department of Public Works and Highways
• Alfredo Espinosa Pascual - secretary of the Department of Trade and Industry
• Erwin Teshiba Tulfo - secretary of the Department of Social Welfare and Development
• Jaime Jimenez Bautista - secretary of the Department of Transportation
• Renato Umali Solidum Jr. - secretary of the Department of Science and Technology
• Raphael Perpetuo Mercado Lotilla - secretary of the Department of Energy
• Maria Susana Vasquez Ople - secretary of the Department of Migrant Workers
• Arsenio Molina Balisacan - secretary of the National Economic Development Authority
• Jose Rizalino Larion Acuzar - secretary of the Department of Human Settlements and Urban Development 

Sa nakaraang pagdinig ng House appropriations comittee para sa hinihinging P13.16 bilyon budget ng COA sa 2023, sinabing naka-medical leave si Calida simula pa noong September 1.

Bukod kay Calida, inihayag ng Palasyo na hindi na bahagi ng Marcos administration sina ating Executive Secretary Victor Rodriguez, at Trixie Cruz-Angeles na dating press secretary. —FRJ, GMA News